اسلام آباد۔ 12جولائی (اے پی پی) مسلم لیگ (ن) نا باسک قومی اسمبلی و پارلیمانی سیکرٹری برائے خزانہ رانا محمد افضل پارینے کہ اپوزیشن سیاسی پوائنٹ سکورنگ کننگ ئِ، اودے شونداری و شونہالی و ملکی معیشت نا سوگوی تون ہچ ئُ کاریم اس اف، نن تینا آئینی و کانودی حق اکن جنگ کینہ، اسہ انٹرویو اسے ٹی او پارے کہ نن دا چانہ کہ جے آئی ٹی نن تون ہچ ئُ جوان ئُ و مناسب ئُ سلوک اس کتنے و داڑآ نن تینا وکیل آتونن صلابت آن پد عدالت عظمیٰ غاہم ہنانن و جے آئی ٹی نا جاست وپاست نا وڑوڈول آ تینا گڑتی تا درشانی ئِ ہم کرینن۔ جے آئی ٹی نا رپورٹ آ ننے بھاز انگا اعتراض آک ئُ ، نن تینا آئینی و کانودی حق اکن جنگ کینہ و عدالت نا ہر فیصلہ ئِ امنا کینہ۔ اسہ سوج اسے نا ورندی ٹی اوپارے کہ پاناما کیس اٹی داوخت اپوزیشن نا اسہ ہی مسخت اسے ہرا حکومت ئِ بٹنگ و او دا مسخت نا دوئی کن او سیاسی پوائنٹ سکورنگ کننگ ئِ۔ اوپارے کہ اپوزیشن ئِ پاکستان نا شونداری و شونہالی و ملکی معیشت نا سوگوی تون ہچ ئُ کاریم اس اف بلکن او بیرہ حکومت ئِ بٹنگ کن کوشست کننگ ئِ۔ اوپارے کہ اینو اپوزیشن انتس کہ کننگ ئِ داڑآن پاکستان نا اسٹاک ایکسچینج ہم زہمی مننگ ئِ۔
