مہ وتی آئینی ءُ کانودی ھکئَ کارمرز کن اَنتءُ جے آئی ٹی ئِ رپورٹ ئَ را چیلنج کن اَں
اسلام آباد۔11جولائی (اے پی پی) دیمپانی ئِ بنجاھی وزیر خواجہ محمد آصف ئَ گشتگ کہ مہ وتی کانودی ءُ آئینی ھکئَ کارمرز کن اَنتءُ جے آئی ٹی ئِ رپورٹئَ را چیلنج کن اَں، جے آئی ٹی ئِ پیش کتگیں رپورٹس ئِ تہا بے کساس ردی اَست کہ آھانی بنیاتئَ مہ کجام ھم آمید گسی فورمئِ سرئَ ایشیئِ ھلاپ ئَ کیس کُت کن اَنت۔ سئے شمبے ءِ روچئَ یک نجی ٹی وی چینل ئِ گوما گپءُ تران کنانئَ آئی ئَ گشتگ کہ اے مئے 70سالئِ ملکی راج دپتر ئِ بھر اِنت کہ اِدئَ پندل سازگ بوھگئَ اِنت کہ آئیئِ کمک ئَ اُلسی مینڈیٹئَ را ھم پچ گرگ بوھگئَ اِنت۔ آئی ئَ گشتگ کہ دھرنا یک ئِ تہا ھم پندل بوتگ کہ رندئَ اے پدر کنگ بوتگ۔ دیمپانی وزیرئِ گشگ اِنت کہ مزن وزیر محمدنواز شریفئِ نام پانامہ تاک ئِ تہا مان نیست بلے پدا ھم مزن وزیر محمدنواز شریف ئَ وتءَ را ءُ وتی ھاندان ءَ را احتساب ئِ ھاترئَ پیش کتگ۔ ائیئَ گشتگ کہ جے آئی ٹی ئَ رپورٹ ئِ تہا لندنئِ لھتیں کمپنی آں گوں حسین نواز ئِ دروگیں سیادی ھم پدر کنگ بوتگ۔ جے آئی ٹی ئَ وتی رپورٹ ئِ تہا وسیلگ آنی سرئَ گپ کنگ بوتگ جے آئی ٹی ئِ اے رپورٹ ئِ سرئَ اوست نہ کنت۔ آئی ئَ گشتگ کہ جے آئی ٹی ئِ تہا حسن ءُ حسین نواز ئَ گوں بے بنیں جُست کنگ بوتگ کہ ایشانی ھچ راستی نیست ۔
