اسلام آباد۔ 09 جولائی (اے پی پی) وزیراعظم محمد نواز شریف (اینو) دوشنبے نا دے داسو ہائیڈرو پاور ڈٹ انا جوڑ جاڑی کاریم نا بنائِ کیک، ڈٹ آن 4320 میگاواٹ بجلی دوئی مریک۔ ڈٹ پختونخوانا ضلع کوہستان نا خلق داسو ٹی دریائے سندھ آ جوڑ جاڑ کننگ انگ ئِ۔ داسو ہائیڈرو پاور ڈٹ انا سائٹ سلاہ ئی دیامر بھاشانا سائٹ آن 74کلومیٹر ڈاون سٹریم وخت اس کہ اسلام آباد آن 350 کلومیٹر نا فاصلہ غا واقع ئِ۔ ہفتہ نا دے وزیراعظم ہاﺅس نا کنڈآن جاری بیان نا رداٹ ڈٹ آ اِرامرحلہ غاتیٹی عملدرآمد مریک۔ ہر اسہ ڈٹ آن 2160 میگاواٹ بجلی دوئی کننگک۔ اولیکو مرحلہ نا پوروی آ سالانہ کم و ود 12 ملین یونٹ نا بجلی دوئی مریک۔ ڈٹ انا پی سی ۔ون اکن ایکنک مارچ 2014ٹی 486,093 ملین روپئی نا منظوری تسوسس۔ ڈٹ انا اہم سول ورکس انا کنٹریکٹس ایم/ایس سی جی جی سی چائنا ئِ تننگانے۔ معاہدہ آ اینخو سال مارچ اٹی دستخط مسوسس۔ اولیکو مرحلہ نا جوڑجاڑ آتیا 4.2ارب ڈالر خڑچ آتا اندازہ ئِ۔ جہانی بینک ڈٹ اکن 824ملین ڈالر نا کڑز فراوان کننگ ئِ وخت اس کہ ایلو فنڈ آتا بست و بند ئِ واپڈا تینا وسیلہ غاتیان کیک۔ حکومت مست آن ہی ڈٹ اکن ہندی بینک آتا کنسورشیم آن 144 ارب روپئی نا بست و بند کرینے۔ ڈٹ اکن جم اٹنگا وڑاٹ 9917 ایکڑ ڈغار نا گرج ئِ وخت اس کہ زیات تر ڈغار دوئی کننگا زہمی تیٹی داوخت اسکان 1131ملین روپئی بشخ وپانٹ کننگانے۔ داسو ڈٹ نئے بیرہ ملک بلکن خیبر پختونخوا صوبہ کن ہم اہم ئُ شونداری اسکیم اسے۔
