اسلام آباد۔ 08 جولائی (اے پی پی) وزیراعظم محمد نواز شریف پارینے کہ برہان مظفر وانی تحریک آجوئی کشمیر نا اسہ پوسکن ئُ باب اسے نا سرحال ئِ، اسہ سال اس مست دا جواں سال شہادت مقبوضہ کشمیر اٹی تینا دتر اٹ ہراچراغ ئِ روشن کرے، اوڑآن اینو مچ آ وادی ٹیی روشنائی ئِ۔ ہفتہ نا دے مقبوضہ کشمیر اٹی جہد آجوئی نا پنی حریت پسند ورنابرہان مظفر وانی نا اولیکو برسی نا وخت آ کلہو اٹی وزیراعظم پارے کہ دا شہیدی داحقیقت ئِ آخریکو درجہ ٹی ثابت کرینے کہ کشمیر نا چناچنا آجوئی نا جوزہ آن سرشار ئِ، و بھارت نا غاصبانہ کوزہ ئِ امنا کننگ کن آمادہ افس۔ سلہہ نا زور آ قوم تا جوزہ ئِ آجوئی ئِ توننگ مفک۔ بھارتئِ دا حقیقت ئِ ہم بایدے پہہ مروئی مرے کہ تاریخ ئِ کور کننگ مفک۔ اوپارے کہ مقبوضہ کشمیر نا دا تحریک آجوئی ہندی و ہروڑنا بیرونی مداخلت آن بیدس مون آ ہِننگ ئِ۔ برہان وانی نا شہیدی دا بھارتی پروپیگنڈہ ئِ ہم بے نقاب کرینے کہ آجوئی کشمیر نا تحریک خارجی مداخلت اسے نا زیر اثرئِ۔ گدرینگوک آ اسہ سال اٹی کرفیو ، سیکورٹی فورس آتا سنگدلانہ گام گیج و ریاستی ظلم انا باوجود، ہراوڑمقبوضہ کشمیر نا خلقت تینا شہید آتا جنازہ غاتیٹی شرکت کریر و علم حریت ئِ بڑز ئُ بانگ تخار، معاصر تاریخ اٹی دانا ہچ ئُ مثال اس ساڑی اف۔ وزیراعظم پارے کہ برہان وانی نا یوم شہادت مچ آ دنیا ئِ دا کلہو ئِ تننگ ئِ کہ اگہ مقبوضہ کشمیر اٹی ظلم انا دا بازار گرم مس، انسانی حق انا دابھلو کچ اسے آ خلاف ورزی مرسا کرے ، لس شاری تے آہنی چرہ غاتیٹی کورکرسا ہِناتو ولدا دنیا ٹی امن نا ضمانتئِ تننگ مفک۔
