سی پیک نا بابت توانائی نا ڈٹ آتیٹی پوسکن آ ٹیکنالوجی نا کاریم اٹ اتنگ ملک انا مریس وختی شونداری و سوگوی کن اہم کڑد اس ادا کیک
اسلام آباد۔ 08 جولائی (اے پی پی) صدر مملکت ممنون حسین پارینے کہ سی پیک نا بابت توانائی نا ڈٹ آتیٹی پوسکن آ ٹیکنالوجی نا کاریم اٹ اتنگ ملک انا مریس وختی شونداری و سوگوی کن اہم کڑد اس ادا کیک۔ او سائنس و ٹیکنالوجی نا بارواٹی چین نا وزیر گانگ وان تون ہیت وگپ کریکہ۔ ہراہفتہ نا دے داڑے ایوان صدر اٹی اوڑتون اوڑدہی کرے۔ بنجائی وزیر سائنس و ٹیکنالوجی رانا تنویر حسین و ایلو بڑزکو کمامدارآکک ہم داوخت آ ساڑی ئسر۔ صدر مملکت پارے کہ ہڑتوم آ ملک آتا نیام اٹ سائنس و ٹیکنالوجی نا بشخ اٹی ہڑتوم آ کنڈآتا کمکاری ٹی مثبت پیش رفت جاری ئِ و ساڑی آ دورہ نا وخت آ کروک آ فیصلہ غاتیا عملدرآمد آن دا اہم بشخ اٹی کمکاری ئِ پین مون آ دننگک۔ اوپارے کہ سائنسی علم و ٹیکنالوجی سی پیک ڈٹ آتیٹی گچینی اتیک و پاکستان ملکی وڑاٹ خام مال انا تیاری و تیار شدہ مصنوعات آتے پین گچین جوڑ کننگ کن دا علم آن فائدہ ہرفنگ نا خواہش مند ئِ۔ صدر پارے کہ چین پاکستان اقتصادی راہداری اقتصادی کمکاری نا گچین ئُ مثال اسے۔ صدر مملکت پارے کہ چین و پاکستان اِرا آہنی ایلم، اسٹریٹجک پارٹنرز و جوان ئُ ہمسایہ ئُ۔ چین اتون سنگتی پاکستانی خارجہ پالیسی نا سنگ میل ئِ۔ اوہڑتوم آ ملک آتا نیام اٹ بڑزکو کہول آ رابطہ غاتا دا چرجوئی ئِ برجاتخنگ آ زور شاغا۔ ممنون حسین پارے کہ پاکستان چین اتون واپاری تعلقداری تیٹی ودکی کن کوشست آتے برجاءتخک۔ داوخت آ چینی وزیر پارے کہ چین وپاکستان نا سائنس و ٹیکنالوجی تون اوار گچین انگا بشخ آتیٹی اواری اٹ کاریم کننگ نا اسہ مریس ئُ تاریخ اسے۔ اوپاکستان اٹی میری ٹائم ، صنعت، بائیو ڈائی ورسٹی، متبادل توانائی ، ورناسائنسدان تے کن جوائنٹ سائنٹفک لیبز نا اڈتننگ تون اوار غٹ بشخ آتیٹی کمکاری نا ہم پیش کش کرے۔
