لاہور۔ 07 جولائی (اے پی پی) وزیر مملکت نیشنل ہیلتھ سروسز، ریگولیشنز و کوآرڈینیشن سائرہ افضل تارڑ پارینے کہ گدرینگوک آ 3سال اٹی ڈرگ ریگولیشنز نا بابت کروک آ اصلاحات نا سوب پاکستانی فارماسیوٹیکل مصنوعات آتا ایکسپورٹ اٹی بھاز گچینی بس، ملکی تاریخ اٹی اولیکو وار غٹ دوائی تا پیک آتیا بارکوڈ درستی راستی کرفنگ انگ ئِ ہرانا سوب ملکی برآمد آتے پین مون آ دننگ دوئی مریک۔ او جمعہ نا دے داڑے ہندی ہوٹل اٹی فارماسیوٹیکل ایکسپورٹ سیمینار نا کماشی ئِ کریکہ ، داوخت آ صوبائی وزیر خواجہ عمران نذیر و ایلو شخصیت آک ہم ساڑی ئسر ، سائرہ افضل تارڑ پارے کہ نیشنل فارماسیوٹیکل انڈسٹری ، ڈرگ ریگولیٹری اتھارٹی و وزارت نیشنل ہیلتھ سروسز نا 40 ملک آتے معیاری دوائی تا ایکسپورٹ و اُرائی کہول آ دوائی تا گرج آتے پورو کننگ کن اہم پارٹنر ئِ ، اوپارے کہ دُن تو ساڑی آ حکومت ئِ کیہی ویل آک میرات اٹی ملار ولے حکومت چیلنج آتون مون تننگ تون اوار اوار کیہی اڑاند آتے مر کرے۔ اوپارے کہ حکومت داہیت آن جوانی اٹ بلد ئِ کہ فارماسیوٹیکل انڈسٹری ئِ گڑاس علاقہ غاتیٹی ویل آتا مون تروکی ئِ ولے ڈرگ ریگولیٹری اتھارٹی و وزارت نیشنل ہیلتھ سروسز دا ویل آتے اولیتی بنداو تیا ایسر کننگ کن پرعزم ئِ۔
