حویلی بہادر شاہ (جھنگ) ۔ 07 جولائی (اے پی پی) وزیراعظم محمد نواز شریف جمعہ نا دے ضلع جھنگ اٹی حویلی بہادر شاہ پاور پلانٹ نا 760 میگاواٹ نا اولیکو یونٹ نا باقاعدہ بنائِ کرے۔ داوخت آ وزیراعلیٰ پنجاب شہباز شریف ، بنجائی وزیر دیر و بجلی خواجہ آصف ، وزیر پٹرولیم شاہد خاقان عباسی ، بنجائی وزیر ڈٹ بندی و شونداری احسن اقبال ، وزیر مملکت دیر و بجلی عابد شیر علی ، صوبائی وزراءو ایلو بڑزکو کمامدارآک ہم ساڑی ئسر۔ وزیراعظم تختی نا نقاب کشائی ئِ کرسا ڈٹ انا بنائِ کرے و داوخت آ ملکی شونداری و شونہالی کن دعاہم کننگا۔ یات سلے کہ دا ڈٹ انا جم اٹنگا گنجائش 1230 میگاواٹ ئِ و داڑآن ایل این جی نا کمک اٹ بجلی ودی کننگ انگ ئِ ، دا کمبائنڈ سائیکل پاور پلانٹ ئِ و بیرہ 21تُو انا گونڈ ئُ وخت اسے ٹی دانا اولیکو یونٹ پیداوار نا بنائِ کرینے۔ سول ورک انا پوروی، سویچ یارڈ، کولنگ ٹاورز، ایندھن کوڑی کننگ نا ٹینکس، گیس ٹربائن و جنریٹر نا تنصیب نا کاریم نئے بیرہ پاکستان نا تاریخ اٹی ریکارڈ بلکن جہانی کہول آ ہم ریکارڈ وخت آ پورو کننگانے۔ چین نا کمپنی میسر زپاور کنسٹرکشن کارپوریشن و پاکستان نا کمپنی قوی انجینئرنگ لمیٹڈ سرسہبی اتون اولیکو یونٹ نا کاریم پورو کرینے۔ داڈٹ اٹی جدید انگا ٹیکنالوجی ئِ کاریم اٹ اتنگانے و ایل این جی آ دانا ایفیشینسی 62.44درسد ئِ۔ نیپرا نا کنڈآن تروک آ اپ فرنٹ ٹیرف نا موازنہ کننگے تو دا ڈٹ اٹی 57ارب روپئی نا بچت مسنے، ڈٹ اکن ای پی سی کنٹریکٹ ترسا پیپرا کانود آ عمل کننگا و جہانی مسابقتی بولی نا کمک اٹ خریداری نا شفاف نظام ئِ المی جوڑ کننگانے، ہراٹی فی میگاواٹ کم ترین ای پی سی خڑچ بسنے۔ داڈٹ انا پیداوار و انتظامی خڑچ انا لحاظ آن سالانہ 2 ارب روپئی نا بچت مریک۔ حویلی بہادر شاہ پاور پلانٹ نا ٹربائن آتا تنصیب ہم ریکارڈ مدت اٹی ترندی اٹ مسنے و اولیکو ٹربائن ڈٹ انا ہند آ سرمننگ آن پد 94 دے تیٹی ارٹ میکو ٹربائن 74دے تیٹی نصب کننگا، داچاگڑد دوست ڈٹ و ملک اکن توانائی نا متوازن ذرائع نا فراوانی نا بابت حکومت نا عزم انا کنڈآ اسہ پین پیش رفت اسے۔
