وزیراعظم محمد نواز شریف نا کماشی ٹی قومی سلامتی کمیٹی نا دیوان

قومی سلامتی ، علاقائی و جہانی رداٹ خارجہ پالیسی نا بابت معاملہ غاتیا ہیت وگپ
اسلام آباد۔ 07 جولائی (اے پی پی) قومی سلامتی کمیٹی دا ہیت انا اعادہ ئِ کرینے کہ علاقائی امن و شونداری جموں و کشمیر نا بنداوی جھیڑہ غاتون اوار ایسر نا چاری ویل آتا ایسری تون براہ راست گنڈوک ئِ۔ پاکستان بے مثل قربانی و سرسہبی اتون دہشت گردی نا برخلاف جہانی کوشست آتیٹی صف اول نا ریاست نا کڑد ئِ ادا کرینے۔ قومی سلامتی نا دیوان وزیراعظم محمد نواز شریف نا کماشی ٹی جمعہ نا دے داڑے وزیراعظم ہاﺅس اٹی اڈ ہلک۔ وزیراعظم آفس آن جاری بیان نا رداٹ دیوان اٹی قومی سلامتی ، علاقائی و جہانی رداٹ خارجہ پالیسی نا بابت معاملہ غاتیا ہیت وگپ مس۔ داہیت انا اعادہ ئِ کننگاکہ پاکستان بے مثل قربانی و سرسہبی اتون دہشت گردی نا برخلاف جہانی کوشست آتیٹی فرنٹ لائن سٹیٹ نا کڑد ئِ ادا کرینے۔ دنیا ٹی پین اسہ ملک اس ہم جہانی رکھ و سلامتی کن داخہ کوشست کتنے اخس کہ پاکستان کرینے، انسانی و مادی لحاظ اٹ پاکستان بھلو قیمت اس ادا کرینے۔ دیوان اٹی دہشت گردی نا لعنت نا برخلاف جنگ اٹی سیکورٹی فورس، کانود نافذ کروک آ ادارہ غاتا قربانی و قومی عزم انا اعتراف ئِ کرسا دانا ستائِ کننگا۔ ساڑی مروک آک دا ہیت انا اعادہ ئِ کریر کہ علاقائی امن و شونداری کشمیر نا بنداوی ویل آتون اوار ایسر نا چاری ویل آتا ایسری تون براہ راست گنڈوک ئِ ، پاکستان علاقائی و جہانی شریدار آتا کمک اٹ اوغان سروک و اوغان الس آ تالان امن نا عمل نا کمک اٹ اوغانستان اٹی امن و شونداری کن کاریم کرسا کیک و ہموڑے زوت آن زوت حالیت آتے معمول آ اتنگ کن کوشست کرسا کیک ولے داڑکن اوغان حکومت نا کنڈآن تینا علاقہ غا موثر کنٹرول نا بحالی کن اوار کوشست درکار ئِ۔ دیوان اٹی وزیر دفاع خواجہ محمد آصف، وزیر خزانہ اسحاق ڈار، وزیر داخلہ چوہدری نثارعلی خان ، وزیراعظم نا سلاہکار خارجہ امورسرتاج عزیز، چییئرمین جوائنٹ چیفس آف اسٹاف کمیٹی جنرل زبیر محمود حیات، چیف آف آرمی اسٹاف جنرل قمر جاوید باجوہ، چیف آف نیول اسٹاف ایڈمرل محمد ذکاءاللہ ، چیف ایئر اسٹاف ایئر چیف مارشل سہیل امان ، قومی سلامتی سلاہکار لیفٹیننٹ جنرل (ر) ناصر خان جنجوعہ، ڈی جی آئی ایس آئی لیفٹیننٹ جنرل نوید مختار و سینئر سول و عسکری کمامدارآک ساڑی ئسر۔