اسلام آباد۔ 07جولائی (اے پی پی) چین پاکستان اقتصادی راہداری ڈٹ پاکستان ئِ دنیا نا پسندیدہ ملک جوڑ کرینے، پاکستان 2025ءٹی دنیا نا گچین و 2047ءٹی 10 بھلا معیشت آتیٹی اوار مریک، ساڑی حکومت نا گام گیج آتیان ملک ترندی اٹ شون ہلنگ ئِ، دنیا نا ہر مستند جریدہ پاکستان ئِ مون آ بروک آ معیشت گوندنگ ئِ۔ جمعہ نا دے وزارت ڈٹ بندی و شونداری نا کمامدارآک اے پی پی ئِ پاریر کہ سی پیک پاکستان ئِ دنیا نا پسندیدہ انگا ملک جوڑ کرینے، پاکستان اسٹاک ایکسچینج ئِ ایشیاءنا گچین اسٹاک ایکسچینج گوندنگ انگ ئِ، ملکی زرمبادلہ نا کوڑی ٹی مسہ گناہ ودکی مسنے۔ اوپاریر کہ پاکستان چین اتون اقتصادی راہداری نا تغ ئِ پورو کننگ تون اوار اوار تینا ورنااستاد آتا بڑزکو تعلیمی قابلیت آتا پوروی کن امریکہ تون علمی راہداری قائم کرسا 10 ہزار استاد آتا امریکی یونیورسٹی تیٹی بڑزکو تعلیم و تربیت نا بست و بند کننگ ئِ۔ انسانی و افرادی زرکاری نا داخہ بھلا تغ ئِ وخت اس ہم خننگ تنے۔ اوپاریر کہ سی پیک ڈٹ دنیا ٹی جاری غٹ آن بھلا شونداری ڈٹ ئِ ، 55 ارب ڈالر مالیت آن زیات نا پاک چین اقتصادی راہداری ڈٹ پاکستان ئِ ترند رفتار اقتصادی شونداری نا کسر آ دیک، مریس ،بھلن و رکھ روڈ، توانائی نا ڈٹ، انڈسٹریل پارکس و گوادر بندرگاہ نا ڈٹ، ہرانا پوروی دہشت گردی نا برخلاف جنگ آن زہمی پاکستان کن روشن آخبت نانوید ئِ۔ اوپاریر کہ سی پیک نا گونڈ وختی ڈٹ 2018-2017 وخت اس کہ مریس وختی ڈٹ 2020ءآن 2030 ءاسکان پورو مریرہ۔
