وزیراعظم محمد نواز شریف ، اوغان صدر، تاجک صدر و کرغزستان نا وزیراعظم نا ”کاسا1000“ چارملکی دیوان اٹی شرکت
نواز شریف و اشرف غنی اسہ ایلو نا دوپہ دوٹی ہلسا کانفرنس ہال اٹی پترینگار
پوگس(تاجکستان)۔06جولائی(اے پی پی) پاکستان، کرغزستان ، اوغانستان و تاجکستان نا راہشون تاجک دارالحکومت دوشنبے آن کم و ود 36کلومیٹر مر دریانا کنارہ غاسرسوز و شاداب وادی ورزوب نا پرفضاءہند آ اسہ ایلو تون ملار و تینا تعلقداری تیٹی گرم جوشی نا درشانی کن داخوشگوار چاگڑد آن فائدہ ہرفیر۔ وزیراعظم محمد نواز شریف آن بیدس اوغان صدر اشرف غنی ، میزبان تاجک صدر امام علی رحمانوف و کرغزستان نا وزیراعظم سوران بے جین بیکوف ”کاسا1000“ چارملکی دیوان اٹی بشخ ہلکر۔ خاص کر پاکستان و اوغانستان نا نیام اٹ خنوک انگا گڑاس غلط فہمی و اختلاف آتیان قطع نظر دا ایونٹ راہشون تے غٹ انا تین پہ تینی است خواہی نا معاملہ غاتے طے کننگ نا بابت پیش گامی نا موقع اس تس۔ وزیر دیر و بجلی خواجہ محمد آصف ”اے پی پی“ ئِ پارے کہ ”کاسا1000“ اسہ نعمت اس ثابت مس ہراراہشون تے اوڑدہی، خیال آتا درشانی و ہروڑنا معاملہ غاتا ایسری کن مون آ بننگ نا موقع اس تس۔ اوپارے کہ وزیراعظم نواز شریف داکان مست آستانہ ٹی ایس سی او سروک دیوان نا وخت آ اوغان صدر تون اوڑدہی کریسس۔ اوپارے کہ چارملکی سروک دیوان ہم اسہ پین موقع اس فراوان کرے و اومیت کننگک کہ دا علاقائی ہم آہنگی و تین پہ تینی رابطہ غاتے کن وزیراعظم نواز شریف نا تغ ئِ پورو کننگ اٹی کمکار مریک۔ کاسا جاچ دیوان نا ایسری آ وزیراعظم نواز شریف و صدر امام علی رحمانوف دریائے ورزوب نا کنارہ غا پرفضاءہند آ چہل قدمی کریر و تین پہ تینی است خواہی نا معاملہ غاتیا خیال آتا درشانی ئِ کریر۔ داکان پد اوغان صدر اشرف غنی و کرغز وزیراعظم ہم دے انا ارغ اٹی اوڑتون اوار مسر۔ اوغان صدر اشرف غنی ہم وزیراعظم نواز شریف تون ہیت وگپ کرے ہراتم او صدر امام علی رحمانوف تون اوڑدہی آن پد چار کڑدہ ہی سروک دیوان اٹی سرمس ۔ نواز شریف و اشرف غنی اسہ ایلو نا دوپہ دوٹی ہلسا کانفرنس ہال اٹی پترینگار۔