اسلام آباد۔ 06جولائی (اے پی پی) بنجائی وزیر ڈٹ بندی و شونداری و اصلاحات پروفیسر احسن اقبال پارینے کہ اعلیٰ تعلیم یافتہ ورناک قومی شونداری کن المی ئُ ہندا سوب ئِ ساڑی حکومت ہائیر ایجوکیشن نا بجٹ ئِ 21ارب روپئی آن ودفسا 35.5ارب روپئی کرینے۔ داخیال آتا درشانی ئِ او پنچ شنبے نا دے کامرہ ٹی ایئر یونیورسٹی نا بنائی دود اٹی تران کرسا کرے۔ بنجائی وزیر پارے کہ وزیراعظم پاکستان و ساڑی حکومت نا وژن ورناتے جدید علم و ہنر آن آراستہ کننگ نا ئِ ہندا گچین انگا آخبت نا ضمانت ئِ۔ ساڑی حکومت ہائیر ایجوکیشن نا بجٹ ئِ 21 ارب روپئی آن ودفسا 35.5ارب روپئی کرینے۔ اوپارے کہ گدرینگوک آ چارسال اٹی ہائیر ایجوکیشن کمیشن نا بجٹ 130 درسد اسکان ودفنگا۔ حکومت غٹ شاری تے بڑزکو تعلیم نا مساویانہ وارخواہی فراوان کننگ کن ہر ضلعی ہیڈ کوارٹر اٹی یونیورسٹی کیمپ اڈتننگ نا فیصلہ کرے۔ اوپارے کہ فاٹا، گوادر، خضدار و تربت کون آ پسماندہ انگا ضلع غاتیٹی پوسکن ئُ یونیورسٹی تا اڈتننگ کن فنڈ جتا کننگانے۔ پاکستان ئِ ایشین ٹائیگر اس جوڑ کننگ نا تغ ئِ پورو کروئی ئِ تو تعلیم آ چکار تخنگ المی ئِ ۔ اوپارے کہ اینو دنیا نا ہر بھلا شونداری یافتہ معیشت نا بنداو جدید علم و جدت ئِ۔ علم آ مبنی معیشت نا کسر ئِ تینا کروئی مریک و پٹ وپول ، تنقید و جدت آ مبنی سوچ ئِ شون تروئی مریک۔ بنجائی وزیر پارے کہ پاکستان ایئر فورس پاکستان اٹی دہشت گردی نا چٹفنگ کن بھاز قربانی تس و اہم کڑد ادا کرے۔ سوگو پاکستان کن ایئر فورس ئِ سوگو کننگ المی ئِ۔ اوپارے کہ پی ڈبلیو سی نا شمار ے نا رداٹ اگہ پاکستان ہندارفتار اٹ شونداری کرسا کرے تو 2030 اسکان پاکستان نا شمار دنیا نا 20 سوگو معیشت آتیٹی مریک۔
