الیکشن کمیشن ءَ عمران خان ءِ ھلاپءَ آمید گسءِ بے شرپی کیس ءِ گوشدارگ تاں 10جولائی ءَ مھتل کتگ چیف الیکشن کمشنر تحریک انصاف ءِ نیمگءَ چہ بار بارءَ وکیل مٹ کنگءِ سرءَ بزنز گپتگ

اسلام آباد۔ 4جولائی (اے پی پی) الیکشن کمیشن ءَ عمران خان ءِ ھلاپ ءَ آمید گس ءِ بے شرپی کیس ءِ گوشدارگ تاں 10جولائی ءَ مھتل کتگ وھدے کہ سئے شمبے ءِ روچءَ الیکشن کمیشن ءَ آمید گس بے شرپی کیس ءِ گوشدارگءِ تہا تحریک انصاف ءِ وکیل ءَ یک رندے پدا آمید گسءَ پسو جم کنگ ءِ ھاترءَ وھد لوٹ اِتگ بلے چیف الیکشن کمشنر جسٹس (ر) سردار محمد رضابرانز گپتگءُ گشتگ اِت کہ تحریک انصاف ءِ نیمگءَ چہ باربار وکیل مٹ کنگ بوھگءَ اِنت۔ مارا نوں آھانی پسوءِ ضلورت نہ اِنت۔ دوشمبے ءِ روچءَ پیسلہ دیئگ بیت۔ سئے شمبے ءِ روچءَ چیف الیکشن کمشنر جسٹس(ر) سردار محمد رضا ءِ سروکی ءَ پنچ باسکی بینچ ءَ تحریک انصاف ءِ سروک عمران خان ءِ ھلاپ ءَ آمید گس بے شرپی کیس گوشداشتگ۔ کمیشن ءَ وتی گڑی گوشدارگ ءِ وھدءَ تحریک انصاف ءِ وکیل ءِ دزبندی ءِ سرءَ آئی ءَ را پسو جم کنگ ءِ ھاترءَ 4جولائی ءِ گڈی مھلت داتگ بوتگ بلے سئے شمبے ءِ روچءَ یک رندے پدا تحریک انصافءِ وکیل شاہد گوندل ءَ بینچ ءَ را ھال داتگ کہ عمران خان ءَ وتی پسوءَ را گڈی دروشم داتگ بلے آ سنیئر کانود دان ڈاکٹر بابر اعوان ءِ گوما شورءُ صلہ ءَ پد اے پسوءَ داخل کنت کہ ایشیءِ سرءَ چیف الیکشن کمشنر برانز گپتگ ءُ پی ٹی آئی ءِ وکیل ءِ نیمگءَ چہ بار بار ءِ پہیلی لوٹگ ءِ سرءَ گشتگ کہ آ یکوئی ءَ وتی وکیل آں مٹ کنگءَ اِنت ۔ بابر اعوان تحریک انصاف ءِ چیئرمین ءِ نیمگءَ چہ داتگیں وکیل آنی لڑءِ تہا رجسٹرڈ نہ اِنت۔ آئی ءَ گشتگ کہ گڈی گوشدارگءِ سرءَ ھم عمران خانءِ نیمگءَ چہ اے وڑیں پہیلی لوٹگ بوتگ کہ ایشیءِ سرءَ الیکشن کمیشن ءِ نیمگءَ چہ آئی ءَ را گڈی موھ دیئگ بوتگ۔ چیف الیکشن کمشنر ءَ گشتگ کہ مارا نوں ایشی ءِ ضلورت نہ اِنت ۔ دوشمبےءِ روچءَ پیسلہ دیئگ بیت۔ آئیءَ تحریک انصاف ءِ وکیل ءَ را گشتگ کہ شمئے نیمگءَ چہ تاں انگت پسو تیار کنگ نہ بوتگ، مہ آیوکیں روچ ءَ گوشدارگءَ پد پیسلہ ءَ دیئاں کہ ایشی ءِ سرءَ تحریک انصاف ءِ وکیل ءَ گشتگ کہ عمران خان چترال ءَ اِنت، ھمے ھاترءَ وھددیئگ بہ بیت ایشی ءِ سرءَ الیکشن کمشنر ءَ گشتگ کہ عمران خان کدی چترال ءُ کدی نتھیا گلی ءَ اِنت۔ تحریک انصافءِ وکیلءَ گشتگ کہ آ راجی رھشون اِت ایشی ءِ سرءَ چیف الیکشن کمشنر ءَ گشتگ کہ اگاں آ راجی رھشون اِت گڈا چے الیکشن کمیشن راجی ادارگے نہ اِت۔ تحریک انصاف ءِ وکیل ءِ نیمگءَ چہ باربار اے دزبندی کنگ بوتگ کہ گوشدارگ تاں 10جولائی ءَ مھتل کنگ بہ بیت۔ ایشی ءَ چہ پد الیکشن کمیشن ءَ گوشدارگ تاں 10جولائیءَ مھتل کتگ۔