ھزانگءِ بنجاھی وزیر سینیٹر اسحاق ڈار ءِ جے آئی ٹی ءَ پیش بوھگءَ پد ھال درءِ گوما گپءُ تران

اسلام آباد۔3جولائی (اے پی پی) ھزانگءِ بنجاھی وزیر سینیٹر اسحاق ڈار ءَ گشتگ کہ آئی ءَ جے آئی ٹی ءَ را یک یک پئیءِ ھساب داتگ، پانامہ کیس ءِ تہا مزن وزیر محمد نواز شریف ءِ نام نیست، پاکستان آیوکیں تاں 12سال ءَ دنیا ءِ 30مزنیں معیشت آنی لڑ ءِ تہا ھوار بیت، میاں اوستمانی طاقت عمران خان ءِ وسیلگءَ پاکستان ءَ را نیزور کنگءِ پندل سازگ بوھگءَ اِنت ، ارسلان افتخار کیس ءَ را دیم ءَ ایر کنگ بہ بیت کہ شاہ آمید گس ءَ را لوٹ ایت کہ مریم نواز ءَ را طلبی ءِ سرءَ گامگیج چست بہ کنتءُ جے آئی ٹی ءَ را پرمان بہ دنت کہ آئی ءَ را جست دیم دیئگ بہ بنت۔ اے ھیالانی درشانی آئیءَ دوشمبے ءِ روچءَ جے آئی ٹی ءَ پیش بوھگءَ پد ھال درءِ گوما گپءُ تران کنانءَ کتگ۔ آئیءَ گشتگ کہ دوشی شپءَ ٹی وی ءَ ٹکر چلگءَ بوتگ منءَ سئے رندءَ توار کنگ بوتگ ءُ دزگٹیانی سوبءَ شُت نہ کتگ، اے ردیں گپ اَنت، منءَ کہ نوٹس دست کپتگ آ 28جون ءِ بوتگ ءُ منی سٹاف ءَ منءَ وھدے کہ ھال سرکتگ اے 3بجءِ وھد بوتگ ، من شاہ آمید گس ءِ پرمان ءِ سرءَ آئین ءُ کانود ءِ ردءَ پیش بوتگ اُوں۔ ھرچی کہ منءَ جست کنگ بوتگ من ایشانی پسو داتگ اَنت، درسیں معاملات اَنت ساپءُ صلہ اَنت، من سرپد بیں کہ مزن وزیر محمد نواز شریف ءِ ھچ جاگہ ھم پانامہ تاک ءِ تہا نام مان نیست ءُ نہ کمپنی ءِ تہا نام مان ،آ مردمانی کہ نام مان اَنت آ جتاھ جتاھیں پارٹی آنی تہا اَست اَنت ءُ درساں چہ گیش ھمے گپءِ سرءَ پندلی سیاست کنگءَ اَنت۔ کم ءُ گیش 23سال ءَ چہ اے ملک ءِ تہا تماشا بوھگءَ اِنت، لھتیں ریفرنسز مشرف ءِ زمانگءَ جوڈ کنگ بوتگ، اے ریفرنسزبدنیتی ءُ دروگ ءِ بنیاتءَ جوڈ کتگ اَنت ءُ طاقت ءِ زورءِ سرءَ جوڈ کنگ بوتگ اَنت۔23سال ءَ چہ اے ملک ءَ اے ڈرامہ چلگءَ اِنت ، من اگاں اے سئیں ریفرنسز آنی تہا چے یکے ھم درورءَ بدئیں گڈا 14فروری 2000ءَ تفتیشی رپورٹ جوڈ بوتگ، 14فروری ءَ چیئرمین نیب ءَ ایشی ءِ منظوری داتگ، سیکشن 18جی ءِ ردءَ ایشی ءَ را سرجم کتگءُ 14فروری ءَ آمید گسءَ ریفرنس ءَ را پیش کتگ۔