شاہ زیب رند پک کرے کہ بلوچستان نا ورناتیٹی ٹیلنٹ ارے، صوبائی وزیر جان جوڑی و سلاہکار گوازی نا میڈیاتون گپ وتران

کوئٹہ۔ 24 ستمبر (اے پی پی) صوبائی وزیر جا ن جوڑی بخت محمد کاکڑ و سلاہکار گوازی مینا مجید ئسک پارینو کہ شاہ زیب رند پک کرینے کہ بلوچستان نا ورناتیٹی ٹیلنٹ ارے، اینو الس و آفیشل آک شاہ زیب رند ءِ بخیرکننگ کن بسنو، شاہ زیب رند ءِ غٹ وسیلہ فراوان کینہ تانکہ او آخبت ہم ملک انا پن ءِ روشنا کننگ کے۔ داخیال آتا درشانی ءِ اوفک سے شنبے نادے آ گوازی گر شاہ زیب رند انا کوئٹہ بالی پٹ آ سرمننگ آ میڈیا تون گپ وتران کرساکریر۔ داوخت آ کراٹے کومبیٹ اٹی جہانی کہول آ کٹنگ نا ٹائٹل برقرارتخوک آ بلوچستان نا گوازی گر شاہ زیب رند پارے کہ تینا شار کوئٹہ غا سرمننگ آ بھاز خوشی مسنے۔ بلوچستان نا ورناتیٹی بھاز ٹیلنٹ ارے، اوفتا مدمقابل فائٹر دنیا نا غٹ آن بھلا فائٹر ئس۔ شاہ زیب رند پارے کہ فائٹ اٹی بناٹی اودے مشکل اتون مون تروئی تما، اونا مدمقابل فائٹر اولیکو وار اوڑآن باتسنے۔ وزیراعلیٰ نا سلاہکار گوازی مینا مجید پارے کہ شاہ زیب رند انا تعلق بلوچستان آن ءِ ننے خوشی ءِ۔ شاہ زیب رند بلوچستان وملک انا پن ءِ روشناکرے، شاہ زیب رند وسیلہ غاتا کمتی آن پد ہم سرسہبی دوئی کرے۔ سلاہکار گوازی پارے کہ نن ہرممکن کوشست کینہ کہ شاہ زیب رند ءِ آخبت فائٹنگ اٹ زرگزرانی مشکل آتون مون تروئی تمپ۔ داوخت آ شاہ زیب رند انا باوہ خیرمحمد پارے کہ بلوچستان حکومت والس نا منت وار اُٹ ہراشاہ زیب ءِ جم وجوش اٹ بخیرکریر۔