وزیراعظم محمد شہباز شریف اقوام متحدہ جنرل اسمبلی نا دیوان اٹی بشخ ہلنگ کن اینو(دوشنبے نادے آ) نیویارک آ سرمریک

نیویارک۔ 23 ستمبر (اے پی پی) وزیراعظم محمد شہباز شریف اقوام متحدہ جنرل اسمبلی نا دیوان اٹی بشخ ہلنگ کن اینو( دوشنبے نادے آ) نیویارک آ سرمریک۔ وزیراعظم میڈیا آفس آن جاری بیان نا رداٹ وزیردفاع خواجہ محمد آصف، وزیرحوالکاری وشینکاری عطاء اللہ تارڑ، وزیر بنجائی تعلیم و کسبی تربیت خالد مقبول صدیقی و خصوصی کمکار طارق فاطمی دورہ ٹی وزیراعظم تون اوار ءُ۔ وزیراعظم تینا دورہ ٹی اقوام متحدہ جنرل اسمبلی نا دیوان آن تران کیک۔ داڑتون اوار اوار وزیراعظم پائیدار شونداری نا ہدف آتون تعلقدار ایس جی ڈی مومنٹ 2024، سلامتی کونسل نا لیڈر شپ فارپیس نا سرحال آن ہائی لیول اوپن ڈیبیٹ و ودوک آ سطح سمندرآ ن گمانی خطرہ غاتیا بڑزکو کہولی دیوان اٹی بشخ ہلنگ و گپ وتران کیک۔ وزیراعظم نیویارک اٹی امریکہ۔ پاکستان بزنس کونسل و پاکستانی بینکرآتون اوڑدہی ہم کیک و اوفتے حکومت نا کاروبار و زرکاردوست پالیسی تیان معلومدار کیک۔ وزیراعظم اقوام متحدہ نا سیکرٹری جنرل انتونیوگوتریس ، جنرل اسمبلی نا صدر فیلیمون یانگ ، یورپیئن کمیشن نا صدر ارسلاوون صڈرلیئن تون اوڑدہی تون اوار اوار گیٹس فاؤنڈیشن نا بانی بل گیٹس، جہانی بینک انا صدر اجے بانگا و جہانی مالیاتی فنڈ انا منیجنگ ڈائریکٹر کرسٹالینا جارجیواتون اوڑدہی ہم کیک۔ وزیراعظم فلسطین نا صدر محمود عباس تون خصوصی اوڑدہی کیک ہراٹی فلسطین اٹی برجا صیہونی ظلم و جور ءِ توننگ و جہانی برادری ءِ دارداٹ گام گیج آتے ترند کننگ کن آمادہ کننگ نا بابت سلابت مریک۔ وزیراعظم دوست ملک آتا سروک آتون ہڑتوم آکنڈآتا اوڑدہی کیک، برونائی دارالسلام نا سلطان حسن البلقیہ نا کنڈآن برونائی نا اقوام متحدہ ٹی رکنیت نا 4 سال پورو مننگ آ تروک آ سوارہ و بنگلہ دیش نا چیف ایڈوائزر ڈاکٹر محمد یونس نا کنڈآن بنگلہ دیش نا اقوام متحدہ نا رکنیت نا 50 سال پورو مننگ آ تروک آ سوارہ ٹی ہم بشخ ہلیک۔ وزیراعظم تینا دورہ ءِ امریکہ ٹی جہانی راہشون آتون موسمیاتی بدلی نا خطرہ غاتا گواچی ملک آتا ویل، پاکستان نا ڈیہہ اٹی دہشت گردی نا چٹفنگ کن قربانی، جہانی زرگزرانی نظام و وامدار ملک آتا ویل، کشمیر اٹی بھارتی غیرکانودی کوزہ و ظلم و جور و اسرائیل نا کنڈآن کودک فلسطینی تا برجا نسل کشی نا بابت توار بڑز کیک۔