اسلام آباد۔ 23 ستمبر (اے پی پی) چیئرمین سینیٹ سید یوسف رضاگیلانی سعوی عرب نا 94 می قومی دے انا وخت آ ولی عہد شہزادہ محمد بن سلمان ءِ مبارکبادی ترسا سعودی سرکڑدہ و الس کن نیک است خواہی نا درشانی ءِ کرینے۔ سینیٹ سیکرٹریٹ نا رداٹ چیئرمین سینیٹ پارے کہ پاکستان ءِ ہڑتوم آ ملک آتا نیام اٹ ایلمی تعلقداری تیا گمر ءِ، ننا است آتیٹی سعودی عرب و اونا الس کن بھاز مہرومریبت و شرف ءِ، سعودی سرکڑدہ غاتا گچین حکمت عملی نا سوب آن سعودی عرب ہرارفتار اٹ شون ہلکنے اوستاکڑزک۔ سید یوسف رضاگیلانی پارےکہ دادے انا رداٹ سعودی عرب نا سرکڑدہ، الس ءِ است انا حب اٹ مبارکباد و نیک است خواہی نا درشانی ءِ کیوہ و دعاکیوہ کہ سعودی عرب دے مرغن نن چنک شون ہلے، سعودی عرب مدام ننا مشکل نا ساہت اٹ تفینے و پاکستانی الس و پاکستان نا حکومت مدام سعودی سرکڑدہ غاتون ہم کوپہ سلیسنو۔ چیئرمین سینیٹ سعودی عرب نا قومی دے انا وخت آ تینا کلہو اٹی سعودی عرب نا ہرفورم آ مخ تفی ءِ برجاتخنگ نا دُوارہ عزم کرے۔ اومستی پارے کہ سعودی عرب ہرمشکل وخت اٹی پاکستان نا کمک ءِ کرینے۔ ہڑتوم آ ایلم ملک آتا تعلقداری تدینگوک آ وخت اتون سوگو آن سوگو ترمریک۔
