کوئٹہ۔ 23 ستمبر (اے پی پی) وزیراعلیٰ بلوچستان میر سرفراز بگٹی تون صوبائی وزیر میر صادق عمرانی، بخت محمد کاکڑ وپارلیمانی سیکرٹری نوابزادہ زرین خان مگسی ئسک اوڑدہی کریر و السی ویل آتا ایسری کن کروک آ گام گیج و تینا تینامحکمہ غاتا انتظامی امور نا بابت گپ وتران کریر۔ داوخت آ صوبائی وزیر جا ن جوڑی بلوچستان بخت محمدکاکڑ پشتون کلچر ڈے انا رداٹ وزیراعلیٰ بلوچستان ءِ روایتی پشتون دستار اسے نا ٹیکی اس پیش کرے۔ وزیراعلیٰ میر سرفراز بگٹی پشتون دودوربیدہ ئی دے انا وخت آ بلوچستان اٹی رہینگوک آ غٹ قوم تے پشتون دودوربیدہ ئی ڈے انا مبارکبادی تس۔ اوپارے کہ دودوربیدہ ہرعلاقہ نا پہچان ءِ تالان کننگ اٹ بھاز اہمیت تخک، پشتون دودو ربیدہ ٹی مہرومریبت ، شرف، ہم گرنچی و رواداری نا درس ملک۔ وزیراعلیٰ پارے کہ قومی کہول آ دودوربیدہ غاتے تالان کرسا ہی قومی یکجہتی ءِ مون آ دننگ مریک۔ اوپارے کہ پاکستان اٹ رہینگوک آ غٹ قومک قومی جوزہ اٹ پاکستان نا شونداری وشونہالی ٹی تینا کڑد ءِ ادا کننگ ءُ۔ میر سرفرازبگٹی صوبائی وزیر آتون گپ وتران کرسا پارے کہ محکمہ جاتی اصلاحات نا کمک اٹ سروس ڈلیوری نانظام ءِ گچین کننگ ننا اولیت ءِ تانکہ الس ءِ مون تروک ویل آتے ایسر کننگ مرے۔ صوبائی وزیرآک، پارلیمانی سیکرٹریکو اسمبلی نا باسک آک الس ءِ مون تروک ویل آتے ایسر کننگ کن متحرک کڑد اداکیر۔ وزیراعلیٰ ،وزیر و پارلیمانی سیکرٹری تے پارے کہ او تیناتینا محکمہ غاتیٹی ہرکہول آ جوابدہی و چیک اینڈ بیلنس نا جوان ءُ نظام اس جوڑکیر و پدتموک سرکاری و السی امور ءِ کانود نا رداٹ ترندی اٹ سرایتر۔ لس بندغ ءِ شنوائی کن گچین ءُ میکنزم اس جوڑکرسا اوڑآ عملدرآمد ءِ پک کیر۔ وزیراعلیٰ داعزم انا درشانی ءِ کرے کہ محکمہ غاتے فعال کرسا سروس ڈلیوری ءِ جوان کینہ انتئے کہ گورننس نا گچینی آن السی ویل آتا دیرپاایسری ممکن ءِ۔
