چین نا صدر شی جن پنگ نا وزیراعظم شہباز شریف ءِ سال دے آ مبارکباد، سٹریٹجک کمکاری  ءِ مون آ دننگ و سی پیک نا تفنگ کن اواری اٹ کاریم کننگ نا است خواہی نا درشان

اسلام آباد۔ 23 ستمبر (اے پی پی) چین نا صدر شی جن پنگ وزیراعظم محمد شہباز شریف ءِ اونا سال دے آ مبارکبادی ترسا اوڑکن نیک است خواہی نا درشانی ءِ کرینے و پارینے کہ ای نیتون اواری اٹ چین پاکستان اسٹریٹجک کمکار ی ءِ مون آ دننگ و سی پیک نا تفنگ کن کاریم کننگ نا خواہنداراُٹ، چینی صدر پارےکہ پاکستان و چین اسٹریٹجک شریدار ءُ ، ہڑتوم آ ملک آک مدام اسہ ایلو آ پت کریر و مدام اسہ ایلوتون تفیر، ننا تعلقداری تیا بدل مروک آ جہانی منظرنامہ وخت اس ہم اثرانداز متنے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ چین نا صدر شی جن پنگ وزیراعظم محمد شہباز شریف ءِ اونا سال دے آ تہنیتی چٹھی اس مون تسنے۔ چینی صدر نا کنڈآن خصوصی وڑاٹ مون تروک آ داچٹھی پاک چین سفارتی تعلقداری نا سوگوی نا کنڈآ اسہ بھلو پیش رفت اسے۔ چٹھی ٹی چین نا صدر شی جن پنگ پارینے کہ نا سال دے آ نے مبارکباد و نیکن نیک است خواہی نا درشانی ءِ کیوہ۔ پاکستان وچین سخت و جوان انگا وخت آتا اسٹریٹجک کمکاری نا شریدارءُ۔ تاریخ گواہ ءِ کہ ہڑتوم آ ملک آک مدام اسہ ایلو آ پت کریر، و مدام اسہ ایلو تون تفینو۔ ہڑتوم آ ملک آتا نیام اٹ ہندنءُ سوگو ءُ رشتہ اس جوڑ مس ہراڑ آ بدل مروک آ جہانی منظرنامہ وخت اس ہم اثرانداز متنے۔ برجاسال جون اٹی نی چین نا سرسہب دورہ اس کریس ہراٹی ننا نیا م اٹ خوشگوار گپ وتران مس و چندی امور تیا امنائی مس۔ چین پاکستان تعلقداری نا سوگوی کنکن بھاز اہمیت تخک۔ نیتون اواری اٹ چین پاکستان اسٹریٹجک کمکاری ءِ مون آ دننگ و سی پیک نا تفنگ کن کاریم کننگ نا خواہندار اُٹ۔ چٹھی ٹی چینی صدر پارےکہ نیتون اواری اٹ چندی بشخ آتیٹی کمکاری و دا پوسکن آ دور اٹی چین وپاکستان نا مخلوق نانیام اٹ تعلقداری آن اسہ اسیجائی  آخبت اسے کن کاریم کننگ نا خواہندار اُٹ۔ نیکن جوان جان جوڑی و ہرگام آ سرسہبی نا تمناءِ۔