اسلام آباد۔ 20 ستمبر (اے پی پی) پاکستان انسٹی ٹیوٹ آف فیشن اینڈ ڈیزائن نا وائس چانسلر پروفیسر حنا طیبہ بنجائی وزیرواپار جام کمال تون اوڑدہی کرے۔ جمعہ نادے آ جاری اعلامیہ نا رداٹ اوڑدہی ٹی پاکستان نا فیشن و ڈیزائن نا بشخ ءِ مون آ دننگ کن اسہ ‘‘ڈیزائن سینٹر کانسیپٹ’’ اس درستی راستی کرفنگ آ گپ وتران کرے۔ اوڑدہی ٹی فیشن انڈسٹری ٹی تعلیم، پٹ وپول و شونداری نا وارخواہی تے مون آ دننگ نا بابت حکمت عملی آ گپ وتران کننگا ہرانا گڈیکو مسخت برآمد آتے مون آ دننگ و جہانی منڈی تیٹی رسینگ دوئی کننگ ءِ۔ پروفیسر حنا طیبہ پارے کہ ڈیزائن سینٹر ناتصور آسٹریلیا، برطانیہ، چین و امریکہ(میامی) کون آملک آتیٹی جہانی کہول آ جوڑ کروک ڈیزائن ہند آتیان زہمی ءِ۔ اوداہیت آ زور شاغا کہ پاکستان اٹی داوڑنا مرکز صنعت نا لائخی تیٹی نمان ودکی کیک، خاص وڑاٹ بڑزکو تعلیم و پٹ وپول اٹی ملک انا جہانی مسابقت اٹی اہم کڑد ادا کیک۔ بنجائی وزیر جام کمال خان دا تصور نا ستاءِ کرے وآخبت مروک آ ایکسپورٹ ڈویلپمنٹ فنڈ(ای ڈی ایف) بورڈ میٹنگ اٹی پین ہیت کننگ نا قول کرے۔ اووزارت واپار نا کنڈآن پورو کمکاری نا باوری کرفے و آخبت ای ڈی ایف دیوان کن فیشن انڈسٹری نا بابت پین سلاہ تا است بڈی ءِ کرے۔
