اسلام آباد۔ 20 ستمبر (اے پی پی) وزیراعظم محمدشہباز شریف ایف بی آر نا انفورسمنٹ نظام ءِ پین فعال کننگ نا بابت جوان ءُ حکمت عملی اس ترتیب تننگ نا پارت کرساپارینے کہ ایف بی آر ملکی زرگزران اٹ تمبہ نا حیثیت تخک، نجی بشخ انا مون آ دننگ حکومت نا اولیت آتیٹی اوار ءِ، فعال وشونہال نجی بشخ ملکی زرگزران کن بے کچ المی ءِ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم فیڈرل بورڈ آف ریونیو نا امور نا بابت اہم دیوان نا کماشی ءِ کرساکرے۔ دیوان اٹی بنجائی وزیر ڈٹ بندی احسن اقبال ، بنجائی وزیر کانود و انصاف اعظم نذیرتارڑ، بنجائی وزیر اقتصادی امور احدخان چیمہ، بنجائی وزیر خزانہ و محصولات محمد اورنگزیب، بنجائی وزیر زرکاری و نجکاری عبدالعلیم خان، بنجائی وزیر پیٹرولیم مصدق ملک، وزیر مملکت خزانہ و محصولات علی پرویز ملک، وزیراعظم نا کوآرڈی نیٹر رانا احسان افضل، اٹارنی جنرل منصور اعوان، گورنر اسٹیٹ بینک جمیل احمد، چیئرمین فیڈرل بورڈ آف ریونیو راشد محمود لنگڑیال و ایلو تعلقدار بڑزکو سرکاری آفیسر آک بشخ ہلکر۔ دیوان اٹی ایف بی آر نا خراج وصولی نا انتظام نا بابت ایف بی آر نا ہوم گرون ٹرانفارمیشن پلان نا اصولی منظوری ءِ تننگا۔ وزیراعظم دیوان آن تران کرسا پارے کہ ایف بی آر ملکی زرگزران اٹی تمبہ نا حیثیت تخک و ایف بی آر نا ڈیجیٹائزیشن حکومت نا اہم زرگزرانی اصلاحات اٹی اہم مزل نا حیثیت تخک۔ وزیراعظم پارے کہ محصولات اٹی گچینی آن الس ءِ خذمت آتافراوانی و راجی بشخ اٹی گچینی بریک۔ وزیراعظم پارے کہ ایف بی آر نا انفورسمنٹ نظام ءِ گچین کننگ وخت انا اہم ءُ گرج اسے۔ وزیراعظم دابابت ایف بی آر نا انفورسمنٹ نا نظام ءِ پین فعال کننگ نا بابت جوان ءُ حکمت عملی اس ترتیب تننگ نا پارت ہم کرے۔ اوایف بی آر ٹرانسفارمیشن پلان نا ستاءِ کرے و پارے کہ جوان خراج تروک آتے ایف بی آر ٹرانفارمیشن پلان آ سلابت کن بٹنگے و اوفتیان سلاہ ہلنگے۔ وزیراعظم ایف بی آر ٹرانفارمیشن پلان نا بابت غٹ تعلقدار اسٹیک ہولڈر آتون پین سلابت و ایف بی آر ءِ دا سلاہ تیا عملدرآمد کن تعلقدار سرکاری محکمہ غاتون اواری اٹ سرجمی اٹ بدلی تا منظوری دوئی کننگ نا پارت ہم کرے۔ نجی بشخ انا اہمیت ءِ تالان کرسا وزیراعظم پارے کہ نجی بشخ انا مون آ دننگ حکومتی اولیت آتیٹی اوار ءِ۔ فعال و شونہال نجی بشخ ملکی زرگزران بے کچ المی ءِ۔ وزیراعظم ایف بی آر نا غٹ ڈٹ آتا تھرڈ پارٹی آڈٹ کرفنگ نا تاکید و اسمگلنگ نا توننگ نا بابت گام گیج آتے ترند کننگ ناپارت کرے۔ دیوان اٹی بشخ ہلوک آتے ایف بی آر ٹرانفارمیشن پلان آ سرجمی اٹ حوال تننگا۔ حوال اٹی پاننگاکہ ایف بی آر پلان اٹی انفارمیشن ٹیکنالوجی نا جوان کاریم اٹ اتنگ، خراج وصولی ءِ گچین کننگ کن ایمانداری اٹ کارکڑد نشان تروک آ آفیسر و چاہندار آک چیئرمین ایف بی آر تون اواری اٹ تدوک آ چِل دے اٹی مرتب کرینے۔ دیوان ءِ پاننگاکہ داپروگرام آن زرگزرانی شونداری نا سفر ءِ توننگ آن بیدس گچین وڑاٹ زیات خراج یکجا کننگ مریک و ہرتپہ غان پورو خراج تروک آ مخلوق ءِ پین آسانی تننگک ۔ سلاہ نا رداٹ وخت آ پورو خراج تفروک و فراڈ اٹی اوار بندغ آتا برخلاف سخت گام گیج و لین دین آ پابندی خلنگ مریک ہراڑآن راج اٹی خراج دُزی نا رجحان ءِ توننگ مریک۔ دا گام گیج آتا نفاذ جوان خراج تروک آتیان گیشتر سلابت آن پد مریک۔ دیوان اٹی ایف بی آر نا خراج وصولی نا بست وبند نا بابت ایف بی آر نا ہوم گرون ٹرانفارمیشن پلان نا اصولی منظوری ءِ تس۔ داپلان وزیراعظم نا پارت آ ایف بی آر ملک انا ایلو زرگزرانی و ٹیکنالوجی چاہندارآتون اواری اٹ ، تدوک آ بیست ءُ پنچ سال انا خراج وصولی نا سرجمی جاچ آن پد ترتیب تسنے۔ ایف بی آر ٹرانفارمیشن پلان نا رداٹ ایف بی آر نا آڈیٹنگ نا کچ ءِ ودفنگک۔ اولیکو ریسہ ٹی ملک ءِ 32درسد خراج ریونیو تروک آ لارج خراج پیئرز یونٹ، کراچی ٹی گچین کارکڑد و دیانت دار آفیسر آتا تعیناتی ءِ پک کننگک و اوفتے تینا کاریم ءِ کننگ کن آڈیٹرز و چاہندار آتا خذمت دوئی مریک۔ جوان کارکڑد نشان تروک آفیسر و عملہ ءِ اعزازیہ ہم تننگک و بھلو چنکو وخت اسے ٹی دا ماڈل ءِ غٹ ملک اٹی نافذ کننگک۔ دیوان ءِ پاننگاکہ ایف بی آر آفیسر آتے کامن ٹرینگ و اسپیشلائزڈ ٹریننگ پروگرام تیان پد ملک انا گچین یونیورسٹی تیان پروفیشنل ڈگری پروگرام پورو کروئی مریک۔ دیوان ءِ پاننگاکہ کسٹم ڈیوٹی نا دُزی نا توننگ کن اپریزمننٹ و انفورسمنٹ نا ہندن ءُ پروگرام ا س جوڑ کرینن ہراٹی اپریزرو انسپکٹر ءِ مہالو آن تینا اسائمنٹ نامعلوم مفک و کاریم اٹی اونا کیمرہ غاتے اٹ چاروکی ہم کننگک۔ کسٹمز انسپکٹرز ءِ گچین کارکڑد پذیرائی و تاخیری چم و وڈی خوری آ سخت سزاتننگک۔ دیوان ءِ پاننگاکہ اسمگلنگ ءِ توننگ کن ایف ڈبلیو او نا کمک اٹ پوسکن ءُ چیک پوسٹ جوڑ کننگ نا فیصلہ ءِ ہم کننگا۔
