وزیراعظم شہباز شریف تون چین انا روئیی گروپ نا ڈل انا وڑدہی، سندھ وپنجاب اٹی جہانی آب انا ٹیکسٹائل پارک آتا جوڑ کننگ آ حوال تس

اسلام آباد۔ 20ستمبر (اے پی پی) وزیراعظم محمد شہباز شریف پارینے کہ چین ہرمشکل وخت اٹی پاکستان تون سلیسنے، چین و پاکستان نا نیام اٹ زرگزرانی تعلقداری ہرہنوک آ دے اتون پین سوگو مننگ ءِ۔ وزیراعظم آفس نا میڈیا ونگ آن جاری بیان نا رداٹ اوداخیال آتا درشانیءِ چیئرمین چیویافونا کماشی ٹی روئیی گروپ نا 9 باسکی ڈل اتون گپ وتران کرسا کرے ہرا جمعہ نادے آ داڑے اوڑتون اوڑدہی کرے۔ اوڑدہی ٹی نائب وزیراعظم و وزیرخارجہ اسحاق ڈار ، وزیر واپار جام کمال خان، بنجائی وزیر صنعت وپیدوار رانا تنویر حسین ، بنجائی وزیر زرکاری و نجکاری عبدالعلیم خان، بنجائی وزیر پاور اویس احمد خان لغاری و ایلو تعلقدار بڑزکو سرکاری آفیسر آک ساڑی ئسر۔ اوڑدہی ٹی پاکستان و روئیی گروپ نا نیام اٹ باندات آتے مون آ دننگ نا بابت اسلام آباد و بیجنگ اٹی ورکنگ گروپس جوڑ کننگ نا فیصلہ ہم کننگا۔ وزیراعظم نا ساڑی آ دورہ ءِ چین آن پد پاکستان اٹی چینی زرکاری نا بابت اہم پیش رفت مسنے و چین نا روئیی گروپ پاکستان اٹ جہانی آب انا ٹیکسٹائل پارکس جوڑ کیک۔ وزیراعظم داوخت آپارے کہ چین پاکستان نا ہموسنگت ملک ءِ ہرا ہرمشکل وخت اٹی پاکستانی تون تفینے۔ چین و پاکستان نا نیام اٹ زرگزرانی تعلقداری ہرہنوک آ دے اتون پین سوگو مننگ ءِ۔ وزیراعظم ڈل ءِ بخیرکرساپارے کہ روئیی گروپ چین پاکستان اقتصادی راہداری نا رداٹ ساہیوال کول پاور پلانٹ نااولیکو زرکارئس۔ وزیراعظم روئیی گروپ نا پاکستان نا ٹیکسٹائل نا بشخ اٹی زرکاری نا بابت بھاز است خواہی نا ستاءِ کرے۔ روئیی گروپ نا چیئرمین چیویافو پارےکہ نن زرکارنا حیثیت اٹ آخا بلکن پاکستان نا سنگت نا حیثیت اٹ پاکستان آ بسونن۔چیئرمین روئیی گروپ وزیراعظم نا بطور وزیراعلیٰ پنجاب دور اٹی ترند رفتار شونداری کاریم تا بابت پنجاب و شہباز اسپیڈ نا ذکر ءِ کرے و اومیت ظاہر کرے کہ داوار ہم شونداری ڈٹ آتا پوروی ٹی ہندا رفتار مون آبریک۔ داوخت آ او حوال ترساپارےکہ روئیی گروپ صوبہ سندھ و صوبہ پنجاب اٹی جہانی آب انا ٹیکسٹائل پارکس جوڑ کیک ہراٹی چین نا 100 انا خڑک بھلا ٹیکسٹائل صنعت آتے زرکری نا سلہ خلنگک۔ دا ٹیکسٹائل پارک آتا وت پاکستان نا ٹیکسٹائل برآمد آتے ودفنگ و پاکستان ءِ دنیا نا ٹیکسٹائل و گارمنٹ حب جوڑ کننگ ءِ۔ دا ٹیکسٹائل پارک آتیٹی شمسی توانائی نا استعمال مریک و دا زیرو کاربن و خودکار پوسکن آ ٹیکنالوجی آ کاریم کیک۔ دا پارک آتیان اولیکوریسہ ٹی 2 ارب امریکی ڈالر وخت اس کہ ارٹ میکو ریسہ ٹی 5 ارب امریکی ڈالر نا برآمدات گمانی ءِ۔ دا ٹیکسٹائل پارک آتیان 3 لکھ آن 5 لکھ ہندی بندغ آتے روزگار نا وارخواہی فراوان مریک۔ دا ٹیکسٹائل پارک آتا بنداو داسال انا ایسر اٹ تخنگک و دامسہ سال انا مد انا تہہ ٹی پورو مریرہ۔ روئیی گروپ کراچی و لاہور اٹی اسہ اسہ ہوسل سیل کموڈٹی ہند ہم جوڑ کیک۔ داوخت آ وزیراعظم نائب وزیراعظم و وزیرخارجہ اسحاق ڈار نا کماشی ٹی خصوصی کمیٹی اس جوڑ کننگ نا پارت کرے۔ کمیٹی ٹی بنجائی وزیر واپار، زرکاری ونجکاری، صنعت وپیدوار، سیکرٹری خارجہ، خصوصی زرکاری سہولت کونسل نانمائندہ و ظفرالدین محمود اوار مریرہ۔ وزیراعظم تون ڈل انا اوڑدہی آن پد زرکاری بورڈ و روئیی شیڈونگ گروپ نانیام اٹ پاکستان اٹ پوسکن آ ٹیکسٹائل پارکس جوڑ کننگ نا بابت مفاہمتی یات داشت آ دستخط نا دود اس اڈ ہلک ہراٹی وزیراعظم ہم بشخ ہلک۔