پریکٹس اینڈ پروسیجر آرڈیننس آن عدالتی عمل اٹ پین شفافیت بریک، مقدمہ غاتا سماعت تخوک آ وخت آ مریک، عطاء اللہ تارڑ

اسلام آباد۔ 20 ستمبر (اے پی پی) بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ پارینے کہ پریکٹس اینڈ پروسیجر آرڈیننس آ صدر مملکت دستخط کرینے، آرڈیننس آن عدالتی عمل اٹ پین شفافیت بریک، مقدمہ غاتا سماعت تخو ک آ وخت آمریک، ہراکیس اول بریک اونا سماعت ہم اول مریک، غٹ اصلاحات آتےالس نا فائدہ غاتے مون آ تخسا کننگانے۔ جمعہ نادے آ داڑے خصوصی گپ وتران کرسا بنجائی وزیر حوالکاری پارےکہ وزیراعظم محمد شہباز شریف نا اینو چین نا روہی گروپ نا چیئرمین تون اوڑدہی مس۔ داوخت آ حکومت پاکستان و چین نا روہی گروپ نا نیام اٹ مفاہمت نا یات داشت آ دستخط مس ہرانا رداٹ روہی گروپ پاکستان اٹ ٹیکسٹائل پارکس جوڑ کیک۔ اوپارےکہ روہی گروپ مہالو آن ہی 21 تُو انا ریکارڈ مد اٹی سی پیک نا رداٹ ساہیوال کول پروجیکٹ ءِ پورو کرینے۔ بنجائی وزیرپارے کہ داسہ روہی گروپ پاکستان نا تہہ ٹی ٹیکسٹائل پارک جوڑ کیک، دا ٹیکسٹائل پارک آتے سندھ و پنجاب اٹی جوڑ کننگک۔ اوپارےکہ وزیراعظم نا ساڑی گری ٹی مفاہمت نا یات داشت آ دستخط مس ہرانا رداٹ چین نا دا بھلا گروپ ٹیکسٹائل پارک آتیٹی چین نا 100 آن زیات کمپنی تے ٹیکسٹائل یونٹ خلنگ نا سلہ خلیک۔ بنجائی وزیر حوالکاری پارے کہ روہی گروپ اولیکو ریسہ ٹی 2 ارب ڈالر نا زرکاری کیک وخت اس کہ ارٹ میکو ریسہ ٹی 5 ارب ڈالر نا زرکاری کننگک، جم وڑاٹ 7 ارب ڈالر ان زرکاری مریک۔ اوپارےکہ ٹیکسٹائل پارک آتیٹی ہول سیل سینٹرہم جوڑ کننگک، ہندی وڑاٹ 3 آن 5 لکھ بندغ آتے روزگار نا وارخواہی دُوبریک و پاکستان نا برآمد آتیٹی ہم ودکی مریک۔ اوپارےکہ مہالو آن ننا برآمد آتیٹی 14 درسد ودکی مسنے۔ کرنٹ اکاؤنٹ نسخان کم مسنے، ریکارڈ ترسیلات زر پاکستان آ بسنے۔ اوپارے کہ وزیراعظم شہباز شریف زرگزرانی شونداری نا سفیر ءِ برجاتخانے۔ بنجائی وزیرپارے کہ روہی گروپ نا کنڈآن ٹیکسٹائل پارک جوڑ کننگ آن پاکستان ٹیکسٹائل نا حب جوڑ مریک و مچ آ دنیا ٹی پاکستان نا ٹیکسٹائل مصنوعات آتا برآمد ات مریک۔ پریکٹس اینڈ پروسیجر ز ایکٹ انابارواٹی گپ وتران کرسا بنجائی وزیر حوالکاری پارے کہ پریکٹس اینڈ پروسیجر ز آرڈیننس آ صدرمملکت دستخط کرینے ، بنجائی کابینہ سرکولیشن سمری نا کمک اٹ دا آرڈیننس نا منظوری ءِ تسوسس۔ اوپارے کہ دا آرڈیننس نا رداٹ (3)184اٹی بروک آکیس آتا نوشتہی وڑاٹ پاروئی مریک کہ دا السی اہمیت نا باندات انت اکن ءُ؟ دابابت اسہ باقاعدہ آرڈر اس جاری کننگک کہ (3)184نا رداٹ کیس اس ہلنگانے تو اوٹی انت دُن ءُ ہیت اسے کہ داالسی اہمیت نا حامل کیس اسے۔ اوپارے کہ آرڈیننس نا رداٹ (3)184نا انت کہ آرڈر اس سپریم کورٹ پاس کیک، اونا برخلاف اپیل نا حق ہم تننگانے۔ بنجائی وزیرپارےکہ دا آرڈیننس نا رداٹ جج صاحب آک کیس اٹی انت کہ ہیت اس کیرہ، اونا ٹرانسکرپٹ نوشتہ کننگک و داٹرانسکرپٹ الس کن دوئی مریک، داڑآن عدالتی عمل اٹ پین شفافیت بریک، و مخلوق باقاعدہ ہننگ کیک کہ کیس اٹی انت ریمارکس پاس کننگا۔ اوپارےکہ آئینی پیکج اٹی ہم الس ءِ آسراتی تننگ نا ہیت کننگاسس۔ اوپارے کہ آرڈیننس نا رداٹ ہر کیس ءِ تخوک آ وخت آ بِننگک، ہرا کیس اول بریک اونا سماعت اول مریک، پد آن بروک آ کیس انا سماعت ہم پد آن مریک، دامننگ کپک کہ پد آن بروک آ کیس اول سماعت کن مقرر کننگے۔ اوپارے کہ سپریم کورٹ نا چیف جسٹس ناکماشی ٹی پریکٹس اینڈ پروسیجرایکٹ انا رداٹ اسہ کمیٹی اس جوڑ کننگا سس ہراٹی طے کننگا سس کہ چیف جسٹس داناکماشی ءِ کیک و بڑزکو عدلیہ نا جج و تھرڈ سینئر آ جج داٹی ساڑی مریرہ وداکمیٹی کیس آتے سماعت کن مقرر کیک۔ داٹی بدلی کننگانے، چیف جسٹس کمیٹی نا کماشی ءِ کیک، بڑزکو عدلیہ نا جج داناباسک مریرہ و مسٹ میکو باسک اکن چیف جسٹس سپریم کورٹ نا جج آتیان اسٹ اسے وقتا فوقتا اوار کرساکیرہ، دانا سوب دادے کہ گیشتر مسٹ میکو باسک انا عدم دستیابی نا سوب کیس تاخیر نا گواچی مسرہ۔ اوپارےکہ 63 اےنا نظرثانی کیس اینو اسکان التواء نا گواچی ءِ، دا کیس سماعت کن مقررہی کننگ متو، دا قومی وڑانا باندات ءِ، اوڑآ نظرثانی نا بابت فیصلہ اس بایدے بروسس، داآئین و پارلیمان نا بالادستی و ملک اٹی انصاف نا نظام ءِ پک کننگ کن المی ءِ۔ اوپارے کہ دا غٹ اصلاحات و  ترمیم الس نا فائدہ غاتے مون آتخسا کننگانے و داڑآن عدالتی عمل پین شفاف مریک۔ صدر مملکت آرڈیننس آ دستخط رکرینے  ہرا اہم ءُ مزل اسے۔ داڑآن لس پاکستانی تا زند اٹی گچینی بریک و عدلیہ ٹی التواء نا گواچی کیس آتے سرتننگ اٹ کمک رسینگک وخت اس کہ دنیا ٹی ننا عدلیہ نا رینک ہم گچین مریک۔