اسلام آباد۔ 19 ستمبر (اے پی پی) وزیراعظم محمد شہباز شریف پارینےکہ روس اتون سوگو تعلقداری پاکستان نا خارجہ پالیسی نا اہم اولیت آتیان ءِ، پاکستان روس اتون واپاری، اقتصادی، توانائی، مواصلات و سیکورٹی کمکاری ءِ ودفنگ نا خواہندار ءِ۔ پنچ شنبے نادے آ وزیراعظم آفس نا پریس ونگ آن جاری بیان نا رداٹ وزیراعظم محمد شہباز شریف تون روسی فیڈریشن نا نائب وزیراعظم الیکسی اوورچوک اوڑدہی کرے۔ وزیراعظم شہباز شریف نائب وزیراعظم اوورچک و اونا ڈل ءِ وزیراعظم ہاؤس اٹی بخیرکرے۔ روسی نائب وزیراعظم تون گپ وتران کرسا وزیراعظم پارے کہ روس اتون سوگو تعلقداری پاکستان نا خارجہ پالیسی نا اہم اولیت آتیان ءِ۔ وزیراعظم پارے کہ پاکستان روس اتون واپاری، اقتصادی ، توانائی ، مواصلات و سیکورٹی کمکاری ءِ ودفنگ نا خواہندار ءِ۔ اومستی پارے کہ او بروک آ تُو اسلام آباد اٹی روسی وزیر اعظم مشسٹن نا بیابخیری نا چاری ءُ۔ وزیراعظم پارے کہ داسال جولائی نا اول اٹی اونا صدرولادیمیر پیوٹن تون بھاز بھرمی گپ وتران مسوسس۔ اوہڑتوم آ کنڈآتا کماری ٹی پین ودکی آ گپ وتران کن بڑزکو کہولی ڈل گدریفنگ آ صدر پیوٹن نا منت واری ءِ ہرفے۔ روسی نائب وزیراعظم اوورچک جم و جوش اٹ بیابخیری آ وزیراعظم نا منت واری ءِ ہرفے و روس انا پاکستان تون تعلقداری تے پین سوگو کننگ نا عزم انا درشانی ءِ کرے۔اوپاکستان و روس انا تعلقداری تے تعمیری و تین پہ تینی وڑاٹ فائدہ ئی گوندا۔ ہڑتوم آ فریق آک باقاعدہ رابطہ ءِ برقرار تخنگ آ ہم امنا کریر۔ وزیراعظم و روسی نائب وزیراعظم روس وپاکستان نا نیام اٹ مفاہمت نا یات داشت آ دستخط نا دود اٹی ہم بشخ ہلکر۔ دامفاہمتی یات داشت نا رداٹ اسیجائی فائدہ غاتا غٹ بشخ خاص وڑاٹ واپار، زرکاری، توانائی، آئی ٹی، کشت وکشار، سائنس و ٹیکنالوجی و تعلیم اٹی کمکاری ءِ مون آدننگ ملک۔
