مقبوضہ جموں وکشمیر اٹی مضحکہ خیز گچین کاری تا جہانی کانود نانظر اٹ ہچ ءُ کانودی اہمیت اس اف، ترجمان دفترخارجہ

اسلام آباد۔ 19 ستمبر (اے پی پی) پاکستان پارینے کہ بھارت نا غیرکانودی وڑاٹ کوزہ ٹی جموں وکشمیر اٹی بھارت نا چاروکی ٹی اڈ ہلوک مضحکہ خیز گچین کاری تا اولیکو ریسہ نا جہانی کانودنا نظر اٹ  ہچ ءُ کانودی اہمیت اس اف۔ ترجمان دفترخارجہ ممتاز زہرہ بلوچ پنچ شنبے نادے آ داڑے پریس حوال اٹی پارے کہ اقوام متحدہ نا سلامتی کونسل نا تعلقدار قراردادآتیٹی پیدوار وڑاٹ پاننگانے کہ جموں وکشمیر نا گڈیکو فیصلہ الس نا مرضی نا رداٹ کننگک ہرانا درشانی ءِاقوام متحدہ ناچاروکی ٹی رائے شماری نا کمک اٹ کننگک۔ ترجمان پارے کہ پین عمل اس کشمیری تے حق خودارادیت تننگ نا گیگ بدل مننگ کپک۔ اوپارےکہ بھارت نا غیرکانودی وڑاٹ کوزہ ٹی جموں وکشمیر اٹی 14 سیاسی جماعت آتے کالعدم گوندنگانے و بھاز انگا سیاسی راہشون نظربند ءُ، ہنداسوب آن خوف و بھیم ناچاگڑد اٹ داوڑنا گچین کاری مشق درست اف۔