اسلام آباد۔ 19 ستمبر (اے پی پی) وزیراعظم محمد شہباز شریف 23 آن 27 ستمبر اسکان نیویارک اٹی اقوام متحدہ نا جنرل اسمبلی نا 79 می دیوان اٹی بشخ ہلیک ہراڑے او کثیر الجہتی عمل کن پاکستان نا ثابت قدم عزم انا درشانی ءِ کیک و جہانی امن، سلامتی و شونہالی کن اقوام متحدہ نا کڑد انا مخ تفی نا درشانی ءِ کیک۔ ترجمان دفترخارجہ ممتاز زہرہ بلوچ پنچ شنبے نادے آ داڑے پریس حوال اٹی پارے کہ وزیراعظم اقوام متحدہ نا سلامتی کونسل نا ایجنڈا ٹی فلسطین نا ویل و جموں کشمیر تون اوار متکن آ ویل آتے ایسر کننگ نا اہمیت آہم زور شاغک۔ اوپارےکہ وزیراعظم اقوام متحدہ نا جنرل اسمبلی نا دیوان نا وخت آ اقوام متحدہ نا سیکرٹری جنرل، جنرل اسمبلی نا صدر و پاکستانی پردیسی تتون اوڑدہی کیک ، او سمندر نا کچ اٹی ودکی آن ودی مروک آ وجودی خطرہو ’’لیڈرشپ فارپیس‘‘ تون اوار بڑزکو کہول انا کیہی دیوان تیٹی ہم بشخ و اقوام متحدہ نا سلامتی کونسل نا آجوشرہ ٹی بشخ ہلیک۔ نائب وزیراعظم و وزیرخارجہ ہرا وزیراعظم تون اوار مریک، 22و23 ستمبر آ اقوام متحدہ نا سیکرٹری جنرل ناکنڈآن بٹنگوک آ ’’سمٹ آف دی فیوچر‘‘ اٹی پاکستان نا نمائندگی ءِ کیک، او او آئی سی نا وزراء خارجہ نا سالانہ رابطہ میٹنگ ، جموں و کشمیر آ او آئی سی رابطہ گروپ نا دیوان، G-77و چین نا وزارتی دیوان و غیروابستہ تحریک نا وزارتی دیوان اٹی ہم بشخ ہلیک۔
