اسلام آباد۔ 19 ستمبر (اے پی پی) اسپیکر قومی اسمبلی سردار ایا ز صادق کفایت شعاری و قومی پیسہ نا بچت کن اسمبلی سیکرٹریٹ نا خڑچ آتیٹی کمتی اتنگ کن خصوصی گام گیج کننگ نا پرمان کرینے ہرانا رداٹ اسٹیشنری تون اوار ایلو آئٹم تیٹی 50 درسد کٹوتی نا فیصلہ کننگا۔ چارشنبے نادے آ قومی اسمبلی سیکرٹریٹ آن جاری سرکلرنا رداٹ اسپیکر قومی اسمبلی نا پارت آ کفایت شعاری مہم نا رداٹ اسمبلی سیکرٹریٹ ملک ءِ مون تروک مالی چیلنج آتا رداٹ خڑچ آتیٹی کمتی نا فیصلہ کرینے۔ السی پیسہ غاتا بچت ءِ پک کننگ کن سخت کفایت شعاری نا گام گیج کننگانے ہرافتا مسخت قومی فائدہ غاتیٹی بے گرج خڑچ آتے کم کننگ ءِ۔ سیکرٹریٹ غٹ آفیسر و بشخ آتے کفایت شعاری گام گیج آتیا سختی اٹ عمل کننگ ناپارت کرینے۔ اسٹیشنری آئٹم و ایلو گڑاتا محتاط کاریم اٹ اتنگ ءِ پک کروئی مریک۔ اسٹیشنری و ایلو گڑاتا ڈیمانڈ تُو اٹی بیرہ اسہ وار تعلقدار 20 گریڈ یا اوڑآن بڑز انا آفیسر نا موکل اٹ کننگک۔ جوائنٹ سیکرٹری (ایڈمن) و ڈپٹی سیکرٹری (ایڈمن) ءِ بے گرج اسٹیشنری نا طلبی آ 50 درسد کٹوتی نا اختیار تننگانے۔ داہم پارت کننگانے کہ کاغذ نا ہڑتوم آ کنڈآتا کاریم اٹ اتنگ ءِ ہرحال اٹ پک کننگے۔ اسٹیشنری نا کاریم اٹ اتنگ اٹی کمتی کن کاغد و نوٹ شیٹ ناہڑتوم آ کنڈآتا کاریم اٹ اتنگ المی مریک۔ اسمبلی سیکرٹریٹ ءِ غیراستعمال شدہ سرکلر نا دُوارہ کاریم اٹ اتنگ المی گوندنگانے۔ داسرکلر آتا فالتو کاپی،ہرافتے ٹی خورک جاگہ مرے، ڈرافٹ تیار کننگ کن کاریم اٹ اتنگے۔ آف سیٹ پیپر و نوٹ شیٹ نا کاریم اٹ اتنگ ڈرافٹ نوشتہ کننگ کن ممنوع مریک۔ سرکلر ٹی دفترآتا ٹیل فون تا محتاط کاریم اٹ اتنگ ءِ پک کننگ نا ہم پارت کننگانے۔ ہراآفیسر آتا دفتر نا ٹیل فون تیا حد مقرر اف او تیناٹیل فون تا کاریم اٹ اتنگ ءِ کم آن کم کیر۔ ٹیل فون نا بے گرج بل آتیٹی کمتی اتنگ کن گام گیج کننگ نا پارت کننگانے۔ ٹیل فون نا بے گرج کاریم اٹ اتنگ اٹی کمتی اتنگ آن گمانی حد اسکان خڑچ آتیٹی کمتی کننگ مریک۔ ہموآفیسر ہرا ٹیل فون تا کاریم اٹ اتنگ نا مقرر حد تخرہ او تینادفترنا ٹیل فون بل آتیٹی کمتی اتیر۔ ٹیل فون تا بل آتیٹی کمتی اتنگ آن السی پیسہ غاتا بچت و قومی فائدہ غاتے پک کننگ مریک۔ اسپیکر قومی اسمبلی سیکرٹریٹ ءِ دا گام گیج آتیا سختی اٹ عملدرآمد ءِ پک کننگ ناپارت کرساپارے کہ بے گرج خڑچ آتیٹی کمتی اتسا ملک ءِ مون تروک مالی مشکل آتا مون ءِ توننگ مریک۔
