صدر مملکت آصف علی زرداری بھارتی غیر کانودی کوزہ ٹی جموں و کشمیر اسمبلی نا گچین کاری تے مسترد کرے

اسلام آباد۔ 18 ستمبر (اے پی پی) صدر مملکت آصف علی زرداری بھارتی غیرکانودی کوزہ ٹی جموں وکشمیر اٹی کانو دساز اسمبلی نا گچین کاری تے دوٹوک وڑاٹ مسترد کرسا پارینے کہ دا گچین کاریک کشمیری الس نا حق خودارادیت نا نعم البدل مننگ کپسہ۔ اوداہیت آ زور شاغا کہ داوڑنا گچین کاریک کشمیری الس کن ناقابل قبول  ءُ و جہانی برادری آن خواست کرے کہ او بھارتی غیرکانودی کوزہ ٹی جموں وکشمیر اٹی برجاانسانی حق انا خلاف ورزی تیا مودی حکومت ءِ جوابدہ گوندے۔ صدر مملکت زور شاغا کہ اقوام متحدہ نا سلامتی کونسل نا قرارداد آتا رداٹ حق خودارادیت کن رائے شماری کن پبی گام گیج کننگے۔ ایوان صدر نا پریس ونگ انا رداٹ صدر مملکت  1989آن پاکستان اٹی رہینگوک باہوٹ آتا ڈل اتون گپ وتران کریکہ۔ ڈل انا کماشی ءِ عزیز غزالی کریکہ۔ ڈل ءِ بخیرکرسا صدر مملکت بھارتی غیرکانودی کوزہ ٹی جموں وکشمیر اٹی کانودساز اسمبلی نا گچین کاری تا مذمت ءِ کرے و اوفتے بھارت نا گیشتر حکمت عملی نا بشخ گوندا ہرانا مسخت علاقہ غا غیرکانودی کوزہ ءِسوگو کننگ ءِ۔ اوداہیت ءِ تالان کرے کہ داوڑنا گام گیج نئے تو بھار ت نا کوزہ ءِ کانودی حیثیت تننگ کیک و نئے کشمیری الس نا آجوئی نا جہد ءِ توننگ کیک۔ اوپارے کہ بھارت ، بھارتی غیرکانودی کوزہ ٹی جموں وکشمیر نا مسلمان تے اقلیت اٹ بدل کننگ و اوفتے تینا ہی وطن اٹی بے اختیار کمیونٹی ٹی بدل کننگ نا کوشست کننگ ءِ۔ صدر مملکت پارے کہ پاکستان کشمیری الس نا حق اکن تروک آ قربانی تا قدر ءِ کیک و اوفتے تون یکجہتی ءِ برجاتخک۔ اوداہیت انا درشانی ءِ کرے کہ پاکستان کشمیری الس ءِ اوفتا حق خودارادیت نا دوئی اسکان اخلاقی، سیاسی و سفارتی مخ تفی فراوان کرسا کیک۔ ڈل صدر ءِ بھارتی غیرکانودی کوزہ ٹی جموں وکشمیر اٹی مودی حکومت نا ظلم آن معلومدار کرے و داہیت ءِ مون آتخا کہ مچ آ کشمیری سرکڑدہ غاتے کشمیری الس نا توار ءِ توننگ کن بند کننگانے۔ ڈل صدر ءِ آزاد جموں وکشمیر اٹی پناہ گزین تا ویل آتیان ہم معلومدار کرے۔ صدر داہیت آ زور شاغا کہ بھارتی غیرکانودی کوزہ ٹی جموں وکشمیر اٹی بھارتی کوزہ گیر فوج انا غیرکانودی گام گیج و ظلم آ برانز ریکارڈ بایدے کرفنگے۔ اوپارے کہ پاکستان باہوٹ آتا راجی و اقتصادی شونداری و اوفتا ویل آتا ایسری کن سنبرینگوک ءِ۔ اوڈل ءِ باوری کرفے کہ آزاد کشمیر حکومتءِ پاننگک کہ او باہوٹ آتیکن گزارہ الاؤنس اٹی ودکی کے و پین کمکی گام گیج فراوان کے۔ اوباوری کرفے کہ بے نظیر انکم سپورٹ پروگرام نا کمک اٹ پاکستان ، 8 ہزار خاہوت آتے آسراتی فراوان کیک۔ ڈل کشمیری الس کن پاکستان نا برجااخلاقی، سیاسی و سفارتی مخ تفی آ صدر نا منت واری ءِ ہرفے۔ ڈل چیئرمین پاکستان پیپلزپارٹی، بلاول بھٹو زرداری نا کڑد و کوشست آتا ہم ستاءِ کرےہرا پاکستان نا مسکوہی وزیر خارجہ نا حیثیت اٹ چندی فورم تیا بھارتی غیرکانودی کوزہ ٹی جموں وکشمیر نا الس کن پبی مخ تفی کرے۔