بنجائی وزیر واپار جام کمال خان تون ترکمانستان نا سفیر عطاجان مولویوف نا اوڑدہی

اسلام آباد۔ 18 ستمبر (اے پی پی) ترکمانستان نا سفیر عطاجان مولویوف بنجائی وزیر واپار جام کمال خان تون اوڑدہی کرے ہراٹی ہڑتوم آ کنڈآتا واپار ءِ ودفنگ و کمکاری ءِ ودفنگ نا بابت گپ وتران کننگا۔ وزارت واپار نا جاری اعلامیہ نا رداٹ چارشنبے نادے آ بنجائی وزیر واپار تون ترکمانستان نا سفیر اونا دفتراٹی اوڑدہی کرے ہراٹی اہم معاہدہ غاتے گڈیکو دروشم اس تننگ و آخبت اٹ کمکاری کن پوسکن آ بشخ آتا پٹنگ آ چکاری کننگا۔ وزیر واپار جام کمال پاکستان و ترکمانستان نا نیام اٹ واپاری کچ ءِ ودفنگ کن سوگو بزنس ٹو بزنس (بی ٹوبی ) اوڑدہی تا گرج آزورشاغا۔ اوتوانائی، کھد ، دواجوڑکننگ، کشت وکشار، و تعمیراتی مواد تون اوار چندی بشخ آتیٹی زرکاری نا گرج آز ورشاغا۔ جام کمال پارے کہ متکن آ ایلمی تعلقداری تیان پد ہم ہڑتوم آملک آتا نیام اٹ واپاری بھاز کم ءِ و دافتے ودفنگ کن گام گیج بھاز المی ءِ۔ اوڑدہی ٹی ترکمانستان۔ پاکستان ٹرانزٹ ٹریڈ ایگریمنٹ ءِ زوت گڈیکو دروشم اس تننگ نا بابت ہم گپ وتران کننگا ہراڑآن ہڑتوم آ ملک آتا نیام اٹ گڑاتا ات و در اٹی نمان ودکی مریک۔ دامعاہدہ بینکنگ، کسٹم و واپاری ٹرانزٹ آپریشن تیٹی کمکاری ءِ ہم گچین کیک۔ وزیرجام کمال ٹریڈ ڈویلپمنٹ اتھارٹی آف پاکستان (ٹی ڈی اے پی ) و ترکمانستان نا چیمبر آف کامرس اینڈ انڈسٹری (سی سی آئی) نا نیام اٹ 2015 ٹی دستخط کروک مفاہمت نا یات داشت کون آ ساڑی آ معاہدہ غاتیا نظرثانی کننگ و اوفتے بحال کننگ نا اہمیت آ ہم زور شاغا۔ دامفاہمت نامہ نا مسخت واپاری کمکاری ءِ مون آدننگ، اسیجائی نمائش آتابست وبند ءِ کننگ و قومی منڈی تے شون تننگ ءِ۔ اومشترکہ بزنس کونسل نا قیام کن 2019 نا ایم اویوآ نظرثانی کننگ آہم زور شاغا ہرا ہڑتوم آ ملک آتا نیام اٹ براہ راست کاروباری رابطہ غاتے آسان کننگ کن بھاز اہم ءِ۔ ہڑتوم آ فریق آک ہڑتوم آ کنڈآتا واپار اٹی ودکی و اقتصادی کمکاری نا کسر اٹ بروک اڑاند آتے مر کننگ نا بابت گپ وتران کننگا۔