اسلام آباد۔ 18 ستمبر (اے پی پی) بنجائی وزیر حوالکاری و شینکاری ، قومی میرات و دودوربیدہ عطاء اللہ تارڑ پارینے کہ دنیا نا کیہی ملک آتیٹی سپریم کورٹ جتا و آئینی عدالت آک جتا مریرہ، آئینی باندات آک آئینی عدالت آتیا کارہ تانکہ لس شاری تے انصاف نا فراوانی نا کسر اٹ اڑاند بف و اوفتا کیس آک زوت تینا ایسر اسکان سرمریر۔ چارشنبے نادے آ میڈیا تون گپ وتران کرسا بنجائی وزیرحوالکاری پارے کہ آئینی ترمیم آتا بابت گیشتر سلابت نا چرجوئی برجاءِ، غٹ سیاسی جماعت آک نئے بیرہ اسہ ایلو تون گپ وتران کریر بلکن دا کوشست کریر کہ داڑآ امنائی سلاہ ودی مرے۔ اوپارے کہ دا بابت پارلیمان ہم تینا کڑد ءِ ادا کرے، اپوزیشن و حکومتی جماعت آک پارلیمان نا تہہ ٹی و پارلیمان آن پیشن داترمیم آتیا است انا حب اٹ گپ وتران کریر و کوشست کریر کہ داڑآ امنائی سلاہ ودی مرے۔ اوپارے کہ وزیرکانود نا دابابت کڑد ستاکڑزک، اوداترمیم آتا بابت غٹ پارٹی تے انگیج کرے و آئینی ترمیم آتا مسودہ نا بابت تینا کڑ د ءِ ادا کرے۔ اوپارے کہ اسپین، جرمنی، اٹلی، تون اوار دنیا نا چندی ملک آتیٹی سپریم کورٹ جتا و آئینی عدالت آک جتا ءُ و آئینی عدالت آتا تہہ ٹی ہی آئینی باندات آک کارہ تانکہ ایلومقدمہ غاتیٹی لس شاری تا کیس آتے وخت آ سرتننگ مرے و اوفتے انصاف ملنگ کے۔ اوپارے کہ پاکستان اسٹ انگا ملک ءِ ہراڑے 9 مئی نا کیس اسکان نا فیصلہ مننگ کتو۔ بنجائی وزیرپارے کہ امریکہ ٹی کیپیٹل ہل نا کیس آتا منہ تُو اٹی سرتننگا، ہرافک ہم ہلڑ بازی کریر، سرکاری ملکیت آتے نسخان تسر و جلہو کریر ہموغٹ تینا کیفرکڑداسکان سرمسر۔ اوپارے کہ انت سوب ءِ کہ داڑے 9 مئی نا دوبہ دار آتا کیس آتیا داسکان فیصلہ مننگ کتنے۔ اوپارے کہ آئینی ترمیم آتا مسخت بیرہ ہنداخس ءِ کہ آئینی عدالت آتے جتا کننگے تانکہ آئینی باندات آتے جتا بِننگ مرے و ایلو عدالت آتیٹی پاکستان نا اری تا کیس آتا وخت آ فیصلہ مننگ کے۔ عدلیہ ٹی ہزار آکیس آک التوانا گواچی مریرہ۔ اوپارےکہ وزیرکانود ہرامسودہ ءِ تیارکرے اوڑآ پی ٹی آئی سیاست کرے و پاننگاکہ ننا لیڈر ءِ پیشن کشر ولدا آئینی ترمیم آ ہیت مریک۔ بنجائی وزیر پارے کہ کس اس این آراو ملنگ کن ہِنپننگ ءُ۔ اگہ دا سمجھرہ کہ آئینی ترمیم تیا انصاف نا فراوانی ءِ آسان کننگ و انصاف نا دوئی کننگ ءِ گچین دروشم اس تننگ آ دا تینا ڈیمانڈ اس اتیرہ کہ ننا لیڈر ءِ اِلبو، تو اوفتا این آراو ملنگ نا است خواہی پورو مفک۔ دااوفتا متکن آ است خواہی ءِ، تینا دا است خواہی ءِ بارگیننگ شپ کن کاریم اٹ اتپس۔ اوپارے کہ آئینی ترمیم آتا بابت سلابت نا دنگ ءِ ودفنگ انگ ءِ، مولانا فضل الرحمان تون ہم گپ وتران برجاءِ۔ بنجائی وزیرپارے کہ کانود ہرامسودہ ءِ تیار کرے اوڑآہم ہیت آتے کننگا، دامسودہ وزیرکانود نا ٹیم تیارکرے، وزارت کانود اٹی لیگل ٹیم و ڈرافٹ مین ساڑی مریک۔ وزیرکانود انت کہ پارت اس جاری کریکہ اونا رداٹ مسودہ ءِ اپ ڈیٹ کرساکننگا، دامسودہ پیپلزپارٹی و جے یو آئی تون اوار ایلو سیاسی جماعت آتون ساڑی الوکہ، ہنداسوب آن اونا غٹ شق آتیا گپ وتران و سلابت مننگ ءِ۔ اوپارے کہ آئینی ترمیم اسہ جامع دستاویز اسے ہراٹی جج صاحب آتا کارکڑد نا جاچ ءِ ہلنگ، انصاف نا نظام ءِ آسان کننگ و انصاف نا وخت آ فراوانی کن شق آک ساڑی ءُ۔ اوپارے کہ چارٹر آف ڈیموکریسی ٹی ہم آئینی عدالت آ رضامندی ظاہر کننگاسس، وکلابرادری نا کنڈآن ہم داڑآ بیان بسنے، داڑآ پین سلابت و امنائی سلاہ ودی کرسا دابایدے مون آکائے۔ اوپارے کہ آئینی ترمیم آتا بابت ابہام و قیاس آرائی ودی کننگ نا کوشست کننگا، گڑاس این آر او خواہنگ ءُ ، داملکی سالمیت و آئین نا باندات ءِ، ننا خواست ءِ کہ داڑآ قیاس آرائی تیان پاناد کننگے۔ اوپارے کہ نن داڑآ مون آ ہِننگ اُن، سیاسی جماعت آک سلابت اٹ اپ ڈیٹڈ مسودہ اس تیارکرینو، اوڑآسلابت مننگ اٹی ءِ و داباندات زوت تینا ایسراسکان سرمریک۔ بنجائی وزیر پارے کہ آئینی ترمیم آتا مسودہ نا تیاری ٹی ایلو ملک آتے ہم ہُننگانے ہراڑے آئینی عدالت آک ساڑی ءُ ہموڑے عدلیہ نا نظام گچین ءِ، دا ملک آتیٹی شاری تے زوت انصاف نا فراوانی ملک۔ اوپارے کہ بروک آ دے تیٹی داباندات آ پین امنائی سلاہ ودی مریک۔
