دولت مشترکہ نا حکومتی سروک آتا دیوان آن باسک ملک آتا نیام اٹ پائیدارشونداری، جمہوری ادارہ غاتا سوگوی و دولت مشترکہ نا ورناتا شونداری کن کمکاری ءِ مون آدننگک ، وزیراعظم شہباز شریف

اسلام آباد۔ 18 ستمبر (ا ے پی پی) وزیراعظم محمد شہباز شریف پاکستان نا کنڈآن دولت مشترکہ و اونا چارٹرآ عملدرآمد نا عزم انا درشانی ءِ کرسا پارینے کہ سموئہ ٹی دولت مشترکہ نا حکومتی سروک آتا دیوان آن دولت مشترکہ نا باسک ملک آتا نیام اٹ چندی امور خاص وڑاٹ پائیدارشونداری، جمہوری ادارہ غاتا سوگوی و دولت مشترکہ نا ورناتا شونداری کن کمکاری ءِ مون آ دننگک۔ چارشنبے نادے آ وزیراعظم آفس نا میڈیاونگ آن جاری بیان نا رداٹ وزیراعظم داہیت ءِ برطانیہ نا بادشاہ چارلس سوم تون ٹیل فون آ گپ وتران اٹی پارے۔ وزیراعظم محمد شہباز شریف تون برطانیہ نا شاہ چارلس سوم ٹیل فون آ رابطہ کرے۔ شاہ چارلس سوم وزیراعظم ءِ اکتوبر اٹی سموئہ ٹی اڈ ہلوک دولت مشترکہ نا حکومتی سروک آتا دیوان (سی ایچ اوجی ایم ) اٹی بشخ ہلنگ نا باقاعدہ سلہ خلک۔ سلہ ءِ امنا کرسا وزیراعظم پارے کہ سموئہ ٹی دولت مشترکہ نا باسک ملک آتا حکومتی سروک آتا دیوان نا اڈتننگ دولت مشترکہ نا تاریخ نا اسہ اہم ءُ دیوان اس مریک انتئے کہ شاہ چارلس نا بادشاہت ءِ سنبھالنگ آن پد دااولیکو دولت مشترکہ نا دیوان مریک ہرانا او تینٹ کماشی ءِ کیک۔ وزیراعظم پاکستان نا دولت مشترکہ و اونا چارٹر آ عملدرآمد ناعزم انا درشانی ءِ کرے وپارے کہ سموئہ ٹی دولت مشترکہ نا ملک آتا نیام اٹ چندی امور خاص وڑاٹ پائیدار شونداری، جمہوری ادارہ غاتا سوگوی ودولت مشترکہ نا ورناتا شونداری کن کمکاری ءِ مون آ دیک۔ شاہ چارلس سوم نا چاگڑدی امور اٹی خاص است خواہی و موسمیاتی پائیداری کن گام گیج آتا ذکر ءِ کرسا وزیراعظم پارے کہ سموئہ ٹی دولت مشترکہ ناسرکڑدہ غاتون موسمیاتی بدلی نا بابت گپ وتران مریک۔ وزیراعظم بادشاہ چارلس سوم نا جان جوڑی نا بارواٹی اَرفے۔ وزیراعظم پرنسس آف ویلز نادرمان پورو مننگ آ اوڑکن ہم نیک است خواہی نا درشانی ءِکرے۔ شاہ چارلس سوم نا تدوک آ دورہ ءِ پاکستان ناذکر ءِ کرسا وزیراعظم اومیت ظاہرکرے کہ بادشاہ و ملکہ زوت پاکستان نا دورہ ءِ کیرہ۔