واجہ محمد صلی اللہ علیہ و آلہ وسلم تانکسکان دنیاارے انسانیت کن ہدایت نا سرچشمہ ءِ، صدر آصف علی زرداری نا 12 ربیع الاول  ءِ ساھت ءَ کلوہ

اسلام آباد۔ 17 ستمبر (اے پی پی) صدر مملکت آصف علی زرداری پارینے کہ خواجہ محمد صلی اللہ علیہ و آلہ وسلم رہتی دنیا اسکان انسانیت کن ہدایت نا سرچشمہ ءِ ، اونا سیرت ءِ طیبہ ننے  زند انا ہر بشخ اٹی راہشونی فراوان کیک، ساڑی آ دور اٹی مون تروک چیلنج آتا مقابلہ ءِ کننگ کن بحیثیت ءِ قوم و بحیثیت ءِ امتِ مسلمہ اسوہ حسنہ ءِ تینا زند انا بشخ کروئی ءِ۔ داخیال آتا درشانی ءِ صدر مملکت 12 ربیع الاول 1446ھ /2024ء نا وخت آ قوم انا پن کلہو اٹی کرے۔ ایوان ءِ صدر نا پریس ونگ انا رداٹ صدر مملکت مچ آ قوم ءِ 12 ربیع الاول نا پرمسرت وخت آمبارکبادی ترساپارینے کہ اللہ تعالیٰ دامبارک تُو اٹی ننے تینا محبوب خاتم النبیین خواجہ محمد صلی اللہ علیہ و آلہ وسلم نا ولادت نا دروشم اٹ عظیم ءُ نعمت اس عطاکرے۔ خواجہ صلی اللہ علیہ و آلہ وسلم رہتی دنیا اسکان انسانیت کن ہدایت نا سرچشمہ ءِ۔ دادے ہرمسلمان نا است اٹی عشق رسول  صلی اللہ علیہ و آلہ وسلم نا شمع ءِ روشناکیک وننے داکلہو نا یات ترفک ہراظلمت ءِ چٹفسا مینار نورمس۔ صدر مملکت پارے کہ اللہ تعالیٰ رسول اللہ صلی اللہ علیہ و آلہ وسلم نا زند ءِ ننکن گچین ءِ وڑاٹ گوندا۔ خواجہ صلی اللہ علیہ و آلہ وسلم  نا سیرتِ طیبہ ننے زند انا ہر بشخ اٹی راہشونی فراوان کیک۔ خواجہ صلی اللہ علیہ و آلہ وسلم عدل و انصاف آ تالان راج اس جوڑ کرے ہراڑے ہربندغ، چائے او ہزگار مرے یا نیزگار، عزت و شرف اٹ رہینگ انگ کریکہ۔ اینو ننے بحیثیت ءِ قوم و بحیثیت ءِ امتِ مسلمہ اونا اسوہ حسنہ ءِ تینا زند انا بشخ کروئی ءِ تانکہ نن ساڑی آ دوراٹی مون تروک چیلنج آتا مقابلہ ءِ کننگ کین۔ صدر مملکت پارے کہ رسول اللہ صلی اللہ علیہ و آلہ وسلم ارشار فرمائفے کہ جوان انگا انسان ہمودے ہرا ایلوفتے فائدہ ایتے چنانچہ دا مبارک وخت آ ، ننے نبی اکرم صلی اللہ علیہ و آلہ وسلم نا انسانیت تون مہرومریبت و ہمدردی نا کلہو ءِ لس کننگ نا گرج ءِ۔ خواجہ صلی اللہ علیہ و آلہ وسلم مدام ایلوفتا کمک  و نصرت نا درس تس۔ چائے چوری تا خیال مرے ، نیزگار آتا کمک  مرے یا ناجوڑ آتا تیمارداری، خواجہ صلی اللہ علیہ و آلہ وسلمنازند ہرلمحہ انسانیت نا خذمت نا عملی وڑءِ۔ اوپارےکہ خواجہ صلی اللہ علیہ و آلہ وسلم ننے دا ہیل تس کہ  ظلم انا برخلاف توار بڑز کننگ و مظلوم نا کمک ءِ کننگ ایمان نا بشخ ءِ، اینو دنیا تقسیم و ظلم و زیادتی نا گواچی ءِ، ننے خواجہ اکرم صلی اللہ علیہ و آلہ وسلم نا کلہو ءِ تالان کروئی ءِ ہرا مہرومریبت ، رواداری و انسانی حق انا ضامنءِ۔ اوہرانسان چائے او مسلمان مرے یا غیرمسلم اتون شرف وعزت نا سلوک کرے۔ ننے ہم ہندا جوزہ نا رداٹ مچ آ دنیا ٹی ایلمی ، عدل و مہرومریبتءِ مون آ دروئی ءِ۔ صدر مملکت پارےکہ ببو دامبارک دے ءِ انسانیت نا راجی آسودہی کن وقف کین و خواجہ محمد صلی اللہ علیہ و آلہ وسلم نا رغاموک آتے تینا عمل نا بشخ کین۔ کنادعاءِ کہ اللہ تعالیٰ پاکستان ءِ امن ، شونداری و شونہالی نا کنڈآ دے و ننے خواجہ محمد صلی اللہ علیہ و آلہ وسلم ناسیرت طیبہ غا عمل کننگ نا توفیق عطاکے۔