اسلام آباد۔ 16 ستمبر (اے پی پی) وزیراعظم محمد شہباز شریف پارینے کہ ملک اٹی زرکاری و کاروباری سرجز آتیٹی ودکی کن ترندی اٹ اصلاحات برجاءِ، حکومت ملک اٹی پیشن نا زرکاری نا کسر اٹ غٹ اڑاند آتے چٹفنگ ءِ۔ دوشنبے نادے آ وزیراعظم میڈیا آفس آن جاری بیان نا رداٹ داخیال آتا درشانی ءِ او پیٹرولیم بشخ آن تعلق تخوک آ جہانی شہرت یافتہ کمپنی گنور گروپ نا چیئرمین توربیون تور نقوسٹ و ٹوٹل انرجیزنا ریجنل وائس پریذیڈنٹ مہمت جیلیپو علو تون گپ وتران کرساکرے ہرا داڑے اوڑتون اوڑدہی کرے۔ اوڑدہی ٹی بنجائی وزیر احدخان چیمہ، ڈاکٹرمصدق ملک، خصوصی کمکار طارق فاطمی و تعلقدار بڑزکو کمامدارآک ہم ساڑی ئسر۔وزیراعظم پارےکہ الحمداللہ پاکستان نا زرگزران سوگومرسا شونداری نا کنڈآ ہِننگ ءِ، ملک اٹی زرکاری وکاروباری سرجزآتیٹی ودکی کن ترندی اٹ اصلاحات برجاءِ، ننا زرگزرانی و کاروباری پالیسی تا مثبت بھرم آتا چرجوئی برجاءِ۔ وزیراعظم پارے کہ حکومت ملک اٹی پیشن نا زرکاری ناکسر اٹی غٹ اڑاند آتے مرکننگءِ۔ چیئرمین گنور گروپ توربیون تورنقوسٹ پاکستان نا پیٹرولیم سیکٹراٹی زرکاری ٹی است خواہی نا درشانی ءِکرے۔ وزیراعظم ءِ پاننگاکہ گنورگروپ پاکستان اٹی ٹوٹل پارکونا 50 درسد حصص نا معاہدہ کرینے۔ چیئرمین گنورگروپ پارے کہ وزیراعظم نا کماشی ٹی پاکستان اٹی زرکاری نا مون آدننگ کن مثبت گام گیج کننگ انگ ءِ۔ وزیراعظم تعلقدار کمامدارآتے گنورگروپ ءِ پاکستان اٹ زرکاری کن ہروڑنا آسراتی فراوان کننگ ناپارت کرے۔
