اسلام آباد۔ 16 ستمبر (اے پی پی) بنجائی وزیر ڈٹ بندی، شونداری احسن اقبال پارینے کہ حکومت راجی و اقتصادی و عدالتی اصلاحات کننگ کن سنبرینگوک ءِ ہرانا مسخت ملک ءِ ترند تر اقتصادی شونداری نا کنڈآ دننگ ءِ۔ اونجی میڈیا تون گپ وتران کرسا دوٹوک لوز آتیٹی پارے کہ اسٹ اسے ہم ملک انا امن و سوگوی ءِ نسخان تننگ نا موکل تننگپک۔ بنجائی وزیراحسن اقبال پارے کہ سنگت ملک آک بروک آ پنچ سال اٹی پاکستان اٹی 27 ارب ڈالر نا زرکاری کننگ نا باوری کرفینو۔ اوپارےکہ سعودی عرب 5 ارب ڈالر نا زرکاری کننگ نا پڑو کرینے وخت ا س کہ متحدہ عرب امارات و کویت10، 10 ارب ڈالر و آذربائیجان 2 ارب ڈالر نا زرکاری کیک۔ احسن اقبال پارے کہ چین ہم سی پیک نا ارٹ میکو ریسہ کن آمادگی ظاہرکرینے۔ اوپارے کہ چین شونداری، روزگار، جدت، سرسوز زرگزران و علاقائی شونداری تون اوار پنچ پوسکن آ راہداری تا جوڑ کننگ نا باوری کرفینے۔ وزیر ڈٹ بندی پارےکہ ڈنمارک نا اسہ کمپنی اس پاکستان نا بندرگاہ تا بنداوی پنجر نابشخ اٹی اِرا ارب ڈالر نا زرکاری کننگ ناپڑو کرینے۔
