اسلام آباد۔ 16ستمبر (اے پی پی) وزیراعظم محمد شہباز شریف پارینے کہ پاکستانی قوم پین جوان ءُ راج اسے نا جوڑ کننگ کن اجتماعی وڑاٹ کاریم کیر، عزوہ غاتا عطیہ انسانی ہمدردی نا اسہ ہندن ءُ عمل اسے ہرا ضرورت مند آتے زندانا اسہ پوسکن ءُ موقع اس فراوان کننگ کیک۔ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم جہانی یوم شناخت نا وخت آ تینا کلہو اٹی پارے کہ اینو مچ آ دنیا ٹی شناخت نا جہانی دے ءِ اڈتننگ انگ ءِ، اینونادے نن راج اٹی شناخت نا اہمیت ءِ تالان کینہ۔ شناخت نا تعلق بیرہ درستی راستی تون اف بلکن دا اسہ ہمہ جہتی اصطلاح اسے، ہراڑآن راج انا ہربندغ ءِ قومی فیصلہ غاتیٹی تینا نمائندگی و المی خذمت اسکان رسینگ ملک۔ وزیراعظم پارے کہ اینو نا دے کنے اسہ اہم قومی گام اسے نا بنانا پڑو کرسا خوشی مننگ ءِ ہرانا مسخت عزوہ غاتا عطیہ ءِ مون آ دننگ ءِ، داگام انا رداٹ ہراکہ بندغ منشاکارانہ وڑاٹ عزوہ عطیہ کننگ کن تینے رجسٹرڈ کرفک اونا قومی شناختی کارڈ ا اسہ خاص ءُ لوگواس پرنٹ کننگک ہراکہ انسانی زند بچفنگ نا بابت دا بندغ نا عزم انا اعتراف مریک۔ اوپارے کہ عزوہ غاتا عطیہ انسانی ہمدردی نا اسہ ہند ن ءُ عمل اسے ہراضرورت مند آتے زند انااسہ پوسکن ءُ موقع اس فراوان کننگ کیک۔ ای غٹ شاری تے دا گام اٹی بشخ ہلنگ و زند بچفوک آ کمیونٹی نا بشخ مننگ نا رغامیوہ۔ وزیراعظم پارے کہ یوم شناخت نا جوزہ ءِ مون آتخسا ، ای غٹ ہم وطن آتیان خواست کیوہ کہ او اسہ پین جوان ءُ راج اسے نا جوڑ کننگ کن اجتماعی وڑاٹ کاریم کیر ہراڑے ہر بندغ نا حق ءِ امنا کننگے و اونا شرف ءِ کننگے۔ ای شاری، سول سوسائٹی و حکومتی ادارہ غاتیان خواست کیوہ کہ او شناخت نا بابت آگاہی و تعلیم نا کلچر ءِ مون آ دیر۔ داکوشست اٹی نن ٹیکنالوجی نا اہم کڑد ءِ بایدے گوجالپن، ساڑی آ قومی رجسٹریشن و بائیو میٹرک نظام نا نیام اٹ ہم آہنگی ءِ پین گچین کننگ نا گرج ءِ، و خذمت اسکان رسینگ ءِ آسان کننگ و شناخت ءِ پک کننگ نا درستگی کن ڈیجیٹل ایسر و اختراع نا انضمام بایدے مرے۔ وزیراعظم پارے کہ ننا حکومت داپالیسی تے نافذ کننگ کن کوشست کننگ ءِ ہراننا شاری تا نیام اٹ پت ءِ مون آ دننگ و شاری فرض اٹی زیات آن زیات بشخ ہلنگ نا است بڈی ءِ کیر۔ دامسخت کن شفافیت و جوابدہی بھاز اہم ءِ۔ ہندا پالیسی تا نفاذ آن جمہوری نظام پین سوگو مریک۔
