آئینی ترمیم اہم و سنجیدہ ءُ ویل اسے ہراڑکن سلابت برجاءِ، پارلیمنٹ سپریم ادارہ ءِ، آئین و کانود اٹی ترمیم نا حق دوئی ءِ، بنجائی وزیر حوالکاری عطاء اللہ تارڑ نا میڈیا تون گپ وتران

اسلام آباد۔ 15 ستمبر (اے پی پی) بنجائی وزیر حوالکاری ، شینکاری ، قومی میرات و دودوربیدہ عطاء اللہ تارڑ پارینے کہ آئینی ترمیم اہم و سنجیدہ ءُ باندات اسے، ہراڑکن سلابت نا عمل برجاءِ ، چارٹر آف ڈیموکریسی نا تہہ ٹی قول کننگاسس کہ انصاف نا فراوانی ءِ آسان کننگک ، پارلیمنٹ سپریم ادارہ ءِ و اودے آئین و کانود اٹی ترمیم نا حق دوئی ءِ، الس تینا وونٹ آتے اٹ گچین کرسا ننے پارلیمنٹ آ گدریفینے، داننا فرض آتیٹی اوار ءِ کہ الس نا فائدہ ٹی ہندن ءُ کانود سازی کننگے ہراڑآن الس ءِ فائدہ رسینگے، داترمیم آتیان ہر پاکستان نا زند اٹی گچینی بریک۔ او شنبے نادے آ داڑے پارلیمنٹ ہاؤس نا پیشن میڈیا تون گپ وتران کریکہ۔ بنجائی وزیرپارے کہ آئینی ترمیم آتیٹی تاخیرنا سوب بیرہ سلابتی عمل ءِ ہرانا دنگ ءِ ودفنگانے۔ اوپارے کہ حکومت تینا سیوتی و سیاسی جماعت آتون و مولانا فضل الرحمان اپوزیشن جماعت آتون سلابت کننگ ءِ، ننا ہم اوفتے تون گپ وتران برجاءِ۔ بنجائی وزیرپارے کہ اینو جمہوریت نادے ءِ و دا جمہوری حسن ءِ کہ غٹ سیاسی جماعت آک دا دے اہم آئینی ترمیم کن سلابتی عمل اٹی شریک ءُ۔ بنجائی وزیرحوالکاری پارے کہ دا پاکستان نا تاریخ نا اسہ اہم ءُ موڑ اسے، چارٹرآف ڈیموکریسی ناتہہ ٹی قول کننگاسس کہ انصاف نا فراوانی ءِ آسان کننگک، ملک اٹی انصاف نانظام ءِ گچین کننگ نا کوشست کننگ انگ ءِ و اسہ اسہ شق و اسہ اسہ ٹک آ سلابت کننگ انگ ءِ۔ وزیر حوالکاری پارےکہ مہالو ہم پاریسن کہ خاص ءُ شخصیت اسے کن دا ترمیم آتے کپننگ انگ ءِ بلکن دا ترمیم آتیان ہرپاکستانی نا زند اٹی گچینی بریک، پارلیمنٹ داملک انا سپریم ادارہ ءِ و اودے آئین و کانود اٹی ترمیم نا حق دوئی ءِ، الس تینا ووٹرآتے اٹ گچین کرسا ننے پارلیمنٹ آ گدریفینے داڑکن داہیت ننافرض آتیٹی اوار ءِ کہ الس نا فائدہ ٹی ہندن ءُ کانود سازی کننگے ہراڑآن الس ءِ فائدہ رسینگے، داترمیم آتیان ہر پاکستان نا زند اٹی گچینی بریک۔عطاء اللہ تارڑ پارے کہ آئینی ترمیم آتا بابت مثبت و پورو سلابت پورو کننگ نا کوشست برجاءِ، ننا کوشست ءِ کہ اینو ہی اوڑآ پیش رفت مرے، میڈیا ءِ مروک آپیش رفت آن معلومدار کننگک، داتم اسکان مروک آ تاخیرناسوب بیرہ سلابت ءِ۔ اسہ سوج اسے نا ورندی ٹی وزیر حوالکاری پارے کہ مولانا فضل الرحمان تون اوڑدہی مسنے، پیپلزپارٹی نا ڈل ہم اوڑتون اوڑدہی کرینے، انصاف نا دوئی کننگ کن گچین ءُ گام اس ہرفنگانے و اونا حق اٹی توار بایدے بڑز کننگے۔ اوپارے کہ آئینی ترمیم پاکستان وپاکستان نا الس کن ءِ، آئینی ترمیم سنجیدہ ءُ باند ات اسے ، سلابت اٹی امنائی سلاہ ودی مرے کہ تو اوٹی گچینی ءِ۔ اوپارے کہ کوشست ءِ کہ الس اسکان ترمیم آتا بابت جوان ءُ خبرا س کائے، نن تکنہ کہ دا ترمیم ہراتم مون آ برے تو غٹ ءِ خوشی مرے، سلابت نا نتیجہ ٹی زیات گچین ان پٹ بریک، کانودی چاہندار آک گچین ءُ سلاہ سے آن معلومدار کیرہ۔ وزیر حوالکاری پارے کہ اینو جمہوریت نا دے ہم ارے، دا جمہوریت نا حسن ءِ کہ غٹ سیاسی جماعت آک داسلابت نا بشخ ءُ۔ تاخیرنا بابت میڈیا نا سوج آتاورندی ٹی وزیرحوالکاری و شینکاری پارےکہ گیشتر سیاسی سلابت پورو مننگ اسکان آئینی ترمیم آتیا مون آ ہِننگ اٹی تاخیرمریک، حکومتی جماعت آتا نیام اٹ سلابت نا چرجوئی برجاءِ، مولانا فضل الرحمان اپوزیشن جماعت آتون سلابت ءِ برجاتخانے، مولانا فضل الرحمان صاحب ہنداآئینی ترمیم آتیا سلابت کننگءِ،سلابت اٹی غٹ جماعت آتا کانودی چاہندار آک ساڑی ءُ۔