جمہوریت بنداوی حق انا رکھ و سیاسی، اقتصادی و راجی شمولیت ءِ مون آدننگ نا ذریعہ ءِ، صدر آصف علی زرداری نا جمہوریت نا جہانی دے آ کلہو

اسلام آباد۔ 15 ستمبر (اے پی پی) صدر مملکت آصف علی زرداری پارینے کہ نن شاری تے واکدار کننگ و سیاسی عمل اٹ اوفتا فعال بشخ ہلنگ نا مون آ دننگ اٹ جمہوریت نا اہمیت ءِ تالان کننگ کن جمہوریت دے  ءِ اڈتننگ اُن، جمہوریت اسہ انصاف اٹ راج اسے نا بنداو ءِ، بنداوی حق انا رکھ و سیاسی، اقتصادی و راجی شمولیت ءِ مون آدننگ نا ذریعہ ءِ۔ ایوان ءِ صدر نا پریس ونگ انا رداٹ جمہوریت نا جہانی دے آ تینا کلہو اٹی اوپارے کہ داسال انا جہانی سرحال گچین طرزِ حکمرانی نا مون آدننگ اٹ مصنوعی ذہانت نا کڑد ءِ تالان کیک۔ مصنوعی ذہانت بست وبند اٹی شفافیت، احتساب و کارکڑد اٹی ودکی اتنگ کیک و دا پوسکن آ طرز حکمرانی نااسہ اہم ءُ ذریعہ اسے۔ مصنوعی ذہانت نا کمک اٹ معلومداری آ تالان جاچ فراوان کننگ مریک، ہراڑآن جمہوری عمل زیات شفاف جوڑ مننگ کیک وووٹرآک اومیتدار و اوفتا پالیسی تا بارواٹی اہم معلومداری دوئی کننگ کیرہ۔ صدر مملکت پارےکہ جمہوریت الس نا سیاسی عمل اٹ بشخ ہلنگ، سیاسی تنوع و السی حق انا رکھ انا پن ءِ۔ شاری تا سیاسی، اقتصادی و راجی حق انا رکھ ہی جمہوریت ءِ ایلو نظام ہائے حکومت آن ممتاز کیک۔ اوپارے کہ نناملک انا سیاسی منظرنامہ غا چندی چیلنج آک مون آ بسر۔ شہید ذوالفقار علی بھٹو و شہید گودی بینظیر بھٹو کون آراہشونک ملک اٹی جمہوری عمل نا بحالی و سوگوی کن نمان خذمت سرتسر، اوفتا بدل مفروک عزم و قربانیک جمہوری قدر انا رکھ اکن اوفتا پدریسہ جہد نا یات ترفرہ۔ صدر آصف علی زرداری پارے کہ اینو نن السی نمائندگی نا کمک اٹ جمہوریت نا رکھ، پالیسی تا ٹہیفنگ وملک انااہم ویل آتا ایسری نا کمک اٹ جمہوریت نا رکھ اٹی پارلیمان نا کڑد انا ہم اعتراف ءِ کینہ۔اوپارے کہ پارلیمنٹ ویل آتا ایسری، شمولیت و پاکستان نا روشنا آخبت کن بنداوی ادارہ ءِ۔ اینونادے ، نن جمہوریت تون تینا تعلقداری نا درشانی ءِ کینہ۔ صدر مملکت پارے کہ جمہوری اصول آتا رداٹ ہی نن بریبری، راجی و اقتصادی انصاف، کانود نا حکمرانی و آجوئی درشانی دوئی کننگ کینہ۔ پاکستان ءِ مون تروک چیلنج آتا رداٹ جمہوری ادارہ غاتے سوگو کننگ ، اصلاحات تینا کننگ و جمہوریت نا سوگوی کن اواری اٹ کاریم کننگ المی ءِ۔ صدر آصف علی زرداری پارےکہ ننا قوم انا ویل آتا ایسر اسہ متحرک و جوان جمہوری عمل اٹی تخوک ءِ۔ ببو نن دا عزم انا دشانی ءِ کین کہ نن جمہوری قدر انا پاسداری ءِ کینہ و داہیت ءِ پک کینہ کہ پاکستان اٹ جمہوریت شون ہلے۔