پاکستان جہانی برادری نا اوزون تہہ نا بچفنگ کن جہانی گام گیج آتیٹی اہم کڑد ادا کرے، وزیراعظم شہباز شریف نا اوزون تہہ نا رکھ انا جہانی دے آ کلہو

اسلام آباد۔ 15 ستمبر (اے پی پی) وزیراعظم محمد شہباز شریف اوزون تہہ نا رکھ اکن تینا کوشست آتا جاچ و اوفتے برجاتخنگ نا تینا عزم انا درشانیءِ کرسا پارینےکہ پاکستان جہانی برادری نا اوزون تہہ نا بچنگ کن جہانی گام گیج آتیٹی اہم کڑد ادا کرے۔ وزیراعظم آفس نا پریس ونگ انا رداٹ داخیال آتا درشانی ءِ وزیراعظم اوزون تہہ نا رکھ انا جہانی دے آ تینا کلہو اٹی پارے۔ اوپارےکہ بدبختی اٹ اوزون تہہ ءِ انسانی سرجز آک بھاز زہمی کرینو و داٹی شگاف نا سوب جوڑ مسنو۔ اوپارےکہ اوزون تہہ ٹی شگاف انسان تتون اوار کرہ ارض آ ساڑی ہر ساہدار ءِ خطرہ غاتا گواچی کرینے، ولے اقوام متحدہ نا رداٹ ویانا کنونشن و مونٹریال پروٹوکول نا کمک اٹ جہانی کوشست آتیٹی اوزون تہہ ٹی شگاف ءِ بھلو حداسسکان کم کننگ اٹ سرسہبی است بڈ ہیت اسے۔ اوپارےکہ پاکستان جہانی برادری نا اوزون تہہ نا بچنگ کن جہانی گام گیج آتیٹی اہم کڑد ادا کرے۔ پاکستان 1992 ٹی مونٹریال پروٹوکول ءِ پک کرے ہرااوزون تہہ ءِ چٹفوک آ کیمیائی مادہ (اوڈی ایس) ءِ ریسہ وار چٹفنگ ناننا عزم انا عکاسی ءِکیک۔ اوپارےکہ ہموتم آن پاکستان دابابت نمان مزل آتے عبور کرینے، اوزون تہہ نا رکھ انا گام گیج آتا تسلسل ءِ برجاتخنگ کن حکومت پاکستان 1996 ٹی خصوصی وڑاٹ اسہ نیشنل اوزون یونٹ (این او یو) اس جوڑ کرے۔ دایونٹ نا رداٹ پاکستان کسٹمز، ریفریجریشن وائیر کنڈیشننگ انڈسٹری، وزارت واپار، تکنیکی چاہندار و انجینئر، درآمد کنندگان و پوریاگرآتون تینا اسیجائی کوشست آتا کمک اٹ مونٹریال پروٹوکول نا یانزدہ ریسلہ غاتے سرسہبی اٹ پورو کننگانے۔ پاکستان 2009 اسکان اوزون تہہ ءِ زہمی کروک آ کیمیائی مادہ غاتا اولیکو وڑءِ ریسہ وار چٹفینے و جنوری 2020 اسکان ایچ سی ایف سی ٹی 50 درسد کمتی نا ہدف دوئی کرینے۔ وزیراعظم پارےکہ داڑتون اوار اوار نن 2025 اسکان تینا چندی صنعت آتے اوزون دوست ٹیکنالوجی تیا گدریفسا67.5 درسد کمتی نا ہدف ءِپورو کننگ نا کسرآ ترندی اٹ ہِننگ ءِ۔ وزیراعظم پارے کہ چاگڑدی رکھ انا تئیں ننا اجتماعی عزم پبی وڑاٹ برجاءِ انتئے کہ نن کیگالی ترمیم نا ردات بروک آ ایچ ایف سی فیز ڈاؤن کن تیار اُن ۔ اوپارے کہ ای داوخت آ چاگڑدی رکھ اکن برجا اسیجائی گام گیج آتیکن تینا حکومت نا بدل مفروک عزم انا درشانی ءِ کیوہ، اوزون تہہ نا رکھ اکن ننااجتماعی کوشست چاگڑدی رکھ اکن ننا زمواری و پائیدار شونداری کن ننا جوزہ نا عکاسی ءِ کیک۔ وزیراعظم زور شاغا کہ ببو نن برجاسال انا سرحال ’’مونٹریال پروٹوکول۔ ایڈوانسنگ کلائمیٹ ایکشنز‘‘ نا رداٹ بروک آچین تیکن کرہ ارض نا رکھ انا خاطر تینا متحدہ کوشست آتے برجاتخنگ ناعزم کین۔