خاص ءُ شخصیت اسے کن کانود سازی نا تاثر غلط ءِ، بنجائی وزیر حوالکاری عطاء اللہ تارڑ نا میڈیا تون گپ وتران

اسلام آباد۔ 15 ستمبر (اے پی پی) بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ پارینے کہ خاص ءُ شخصیت اسے کن کانودسازی نا تاثر غلط ءِ، سلاہ ئی کانود سازی گیشتر السی فائدہ غاتیکن ءِ، اجتماعی سوچ اٹ مون آ ہِننگ اُن۔ شنبے نادے آ داڑے پارلیمنٹ ہاؤس اٹی میڈیا تون گپ وتران کرسا بنجائی وزیر حوالکاری پارےکہ الس ءِ دمدستی انصاف نا فراوانی کن بھلو وخت اسے آن اصلاحات نا گرج محسوس کننگاکہ، دابابت گام گیج کننگ اُن۔ اوپارے کہ دا تاثر بالکل غلط ءِ کہ خاص ءُ شخصیت اسے کن کانود سازی کننگ انگ ءِ، سلاہ ئی کانود سازی گیشتر السی فائدہ غاتیکن ءُ۔ اوپارےکہ کیس آتے سرتننگ اٹ کیہی کیہی دہائی لگک ، الس ءِ اوفتا درگہ غا اڑزآن و دمدستی انصاف نا فراوانی اولیت ءِ۔ اوپارےکہ خصوصی پارلیمانی کمیٹی نا دیوان برجاءِ و حکومتی سیوتیک اواری اٹ توسنو، بلاول بھٹو زرداری و اسحاق ڈار چارٹرآف ڈیموکریسی نا ہیت ءِ کرینو۔ اوپارےکہ داباندات آک قومی وڑانا ءُ، واوڑآن مچ آ قوم ءِ فائدہ بایدے مرے، کیہی وار کازلسٹ جاری مفک، نوٹس تننگپک و آرڈر جاری مریک۔ دابابت توازن  ءِ برقرار تخنگ نا نظام مرے۔ بنجائی وزیر حوالکاری پارے کہ کابینہ نا باسک آک ساڑی ءُ، ترمیم آن مچ آ قوم ءِ بایدے فائدہ مرے۔ اجتماعی سوچ اٹ مون آہِننگ اُن۔ اسہ سوج اسے نا ورندی ٹی وزیرحوالکاری پارےکہ آئینی ترمیم کن پراومیت و سنبرینگوک اُن، نمبر گیم نا ہچ ءُ ویل ا س مفک۔ مولانا فضل الرحمان ننا متکن آ سیوتی و سنگت ءِ، گچین ءُ خبربریک۔