بیجنگ۔ 14 ستمبر (اے پی پی) بیجنگ اٹی پاکستان نا سفیر خلیل ہاشمی چین اتون اقتصادی رابطہ غاتے گہراکننگ کن پاکستان نا پکاعزم انا درشانی ءِکرساپارینے کہ چینی کاروباری ادارہ غاک پاکستان نا چندی بشخ آتیٹی زرکاری نا دوئی وارخواہی تیان پبی فائدہ ہرفر۔ اوداخیال آتا درشانی ءِ ہفتہ نادے آ داڑے پاکستان نا سفارت خانہ نا مہمانداری ٹی باوقار چائنا انٹرنیشنل فیئر فار ٹریڈ ان سروسز نا وخت آ ’’پاکستان انویسٹمنٹ کانفرنس۔ ٹوگیدر فاراے شیئرڈ فیوچر‘‘ آن تران کرساکرے۔ کانفرنس نا مسخت پاکستان اٹی چندی بشخ آتیٹی درملکی زرکاریءِ اتنگ ئس۔ دود اٹی پاکستانی و چینی کاروباری برادری تا اہم شخصیت آک بشخ ہلکر و کشت وکشار، صنعت، آئی سی ٹی و بینکنگ کون آ اسٹریٹجک بشخ آتیٹی زرکاری نا وارخواہی تے تالان کننگا۔ کانفرنس اٹی شریک پاکستانی ادارہ غاک ملک انا سازگار کاروباری چاگڑد آ زور شاغسا دا بشخ آتا شونداری آن فائدہ ہرفنگ نا تینا لائخی نا درشانی ءِ کریر۔ بشخ ہلوک آتیٹی بیجنگ نا ڈپٹی سیکرٹری جنرل لیومیئنگ، جہانی واپار نا مون آدننگ کن ڈیکی زوسٹی کونسل نا صدر ہان بن، پنگڈنگشان شار انا پیپلز گورنمنٹ نا ڈپٹی سیکرٹری جنرل ژانگ یان چھنگ و ڈپٹی ڈائریکٹر جنرل وزارت واپار لی این تون اوار کیہی بڑزکو چینی کمامدارآک اوار ئسر۔ تینا خیرمقدمی ہیت آتیٹی سفیر خلیل ہاشمی چین اتون اقتصادی تعلقداری تے گہرا کننگ کن پاکستان نا سوگو عزم آ زور شاغا۔
