اسلام آباد۔ 14 ستمبر (اے پی پی) بنجائی وزیر واپار جام کمال خان و آئل مارکیٹنگ کمپنیک بلوچستان اٹی آئل نا صنعت ءِ مون آدننگ نا عزم انا درشانی ءِ کرینو۔ وزارت واپار نا کنڈآن ہفتہ نادے آ جاری اعلامیہ نا رداٹ بلوچستان اٹی لیسن یافتہ فیول اسٹیشن تا جوڑ کننگ نا بابت بنجائی وزیرجام کمال خان و آئل کمپنی تا نمائندہ غاک اہم اوڑدہی کرینو۔ داوخت آ بلوچستان نا ہرضلع ٹی کم از کم اِرٹ آن مسہ فیول اسٹیشن جوڑ کننگ نا سلاہ تیا سجفنگا ہراڑآن کاروباری سرجزو و روزگار نا وارخواہی تیٹی ودکی گمانی ءِ۔ جام کمال خان دابابت وزیراعلیٰ بلوچستان میر سرفراز بگٹی تون رابطہ کرے تو وزیراعلیٰ بلوچستان پورو حکومتی مخ تفی نا باوری کرفے۔ بنجائی وزیر واپار جام کمال خان پارے کہ لیسن یافتہ فیول اسٹیشن تا کنڈآ پدریسہ منتقلی آن صارف و کاروباری مالک ہڑتوم آتے فائدہ مریک، لیسن یافتہ فیول اسٹیشن تا فریم ورک آن آب اٹ مصنوعات آتا فراوانی ءِ پک کننگک، داڈٹ بلوچستان نا اقتصادی شونداری ٹی اہم کڑد ادا کیک۔ جام کمال خان آئل مارکیٹنگ کمپنی تا ڈٹ آتیکن بنجائی حکومت نا پورو مخ تفی نا باوری کرفسا پارینے کہ بلوچستان نا ایندھن نا صنعت نا آخبت روشناءِ، علاقائی شونداری ٹی اہم کڑد ادا کیک۔ اوایندھن نا بشخ اٹی زرکاری ءِ ودفنگ و کاروباری کچ اٹی ودکی کن ہرممکن کمکاری نا باوری کرفسا پارینے کہ ہراکہ ڈٹ ہراملک اٹی کاروباری سرجزآتے ودفے بنجائی حکومت اودے سپورٹ کیک،داوڑنا ڈٹ آتیان روزگار نا وارخواہی تیٹی ہم ودکی مریک۔
