بنجائی وزیر زرکاری بورڈ، نجکاری و مواصلات عبدالعلیم خان نا بیجنگ نا جہانی زرکاری کانفرنس آن ورچوئل تران

اسلام آباد۔ 14 ستمبر (اے پی پی) چین اٹی انٹرنیشنل فیئر فار ٹریڈ ان سروسز اٹی پاکستان آن 150 کاروباری ادارہ شریک ءُ، تین پہ تینی معاہدہ گمانی ءِ۔ بنجائی وزیر زرکاری بورڈ، نجکاری و مواصلات عبدالعلیم خان نا بیجنگ جہانی زرکاری کانفرنس آن ورچوئل تران کرساپارے کہ مچ آ دنیاغان 107 ملک آتیان 2000 آ ن زیات کمپنی واپاری میلہ ٹی شریک ءُ و پاکستان نا نمائندگی ستاکڑزک۔ عبدالعلیم خان پارےکہ پاکستان اٹ زرکاری کن کشت وکشار، لائیو اسٹاک، فوڈ پراسیسنگ و معدنیات نا بشخ آتیٹی بھاز گنجائشت ساڑی ءِ، پاکستان اٹی کولا نا ارٹ میکو بھلا و تانبہ نا ہفت میکو بھلا کوڑی ساڑی ءِ۔ اوپارے کہ وزیراعظم پاکستان نا جون نا دورہ ءِ چین آن پد بزنس ٹو بزنس سرجزآتیٹی نمان ودکی مسنے، چین و پاکستان نا نیام اٹ سنگتی نا بے مٹ تاریخ وخت اتون پین سوگو مننگ اٹی ءِ۔ پاکستانی کمپنی تے چین آن ’’بی ٹو بی‘‘ سرجزآتیٹی ودکی نا وارخواہی فراوان کننگ اٹی ءِ، سی پیک نا رداٹ پاکستان اٹی ٹرانسپورٹ، انفراسٹرکچر، انرجی و مواصلاتی بشخ آتیٹی نمان گچینی بسنے۔ عبدالعلیم خان مستی پارے کہ چین آن پاکستان اٹی صنعت آتا گدریفنگ نا ستاءِ کینہ۔ اومستی پارے کہ قطبی امریکہ و یورپ نا مقابلہ ٹی پاکستان اٹ صنعت آتا گدریفنگ آ 70 درسد کم خڑچ بریک۔ زرکاری کن چینی ادارہ غاتون پاکستان اٹی ہرممکن عملی کمکاری ءِ پک کینہ، صنعت آتا مون آدننگ آ پبی چکار، اسپیشل اکنامک زون، ایکسپورٹ پراسیسنگ زون و گوادر فری زون گچین وارخواہی ءُ۔ بنجائی وزیر زرکاری بورڈ عبدالعلیم خان بیجنگ اٹی جہانی کانفرنس نا اڈتننگ آ پاکستانی سفارت خانہ ءِ خراج تحسین پیش کرے و پارے کہ چائنا انٹرنیشنل فیئر فار ٹریڈ ان سروسز آن مثبت و شاندار نتیجہ غاتا گمان ءِ۔