بجلی اٹ چلینگوک آ گاڈی تیان پیٹرول و ڈیزل نا درآمد اٹی نہادی زرمبادلہ نا بچت مریک، وزیراعظم محمد شہباز شریف ناالیکٹرک وہیکلز نا کاریم اٹ اتنگ نا بابت دیوان آن گپ وتران

اسلام آباد۔ 14 ستمبر (اے پی پی) وزیراعظم محمد شہباز شریف پارینےکہ بجلی اٹ چلینگوک آ گاڈی تیان نئے بیرہ پیٹرول و ڈیزل نا درآمد نا مد اٹی نہادی زرمبادلہ نا بچت مریک بلکن داگاڈیک چاگڑد دوست ہم مریرہ، ملک اٹی بجلی اٹ چلینگوک آ گاڈی تا مون آ دننگ کن حکومت اولیتی  گام گیج کننگ اٹی ءِ، وزیراعظم الیکٹرک وہیکلز نا بابت اسہ جوان فنانشل ماڈل ا س پیش کننگ ناپارت کرینے ۔ وزیراعظم آفس میڈیا ونگ انا کنڈآن جاری اعلامیہ نا رداٹ وزیراعظم محمد شہباز شریف نا کماشی ٹی الیکٹرک وہیکلز (بجلی اٹ چلینگوک آ گاڈی ) تا کاریم اٹ اتنگ نا بابت دیوان وزیراعظم ہاؤس اسلام آباد اٹی اڈ ہلک۔ داوخت آ دیوان نا بشخ ہلوک آتون گپ وتران کرسا وزیراعظم پارے کہ ملک اٹی بجلی اٹ چلینگوک آ گاڈی تا مون آ دننگ کن حکومت اولیتی گام گیج کننگ اٹی ءِ۔ وزیراعظم پارےکہ بجلی اٹ چلینگوک آ گاڈی تیان نئے بیرہ پیٹرول و ڈیزل نادرآمد نا مد اٹی نہادی زرمبادلہ نا بچت مریک بلکن دا گاڈیک چاگڑد دوست ہم مریرہ۔ وزیراعظم الیکٹرک وہیکلز نا بابت اسہ جوان فنانشل ماڈل ا س پیش کننگ نا پارت کرے۔ اودابابت بنجائی وزارت خزانہ و اسٹیٹ بینک آف پاکستان تون سلابت نا ہم پارت کرسا پارے کہ ای ۔وہیکلز پالیسی داسال نومبرا سکان پورو کننگے۔ اوملک اٹی وی ۔وہیکلز نا تیاری نا بابت لیسن نا ضابطہ ءِ کار ءِ گچین کننگ، ای۔ وہیکلز نا پالیسی نا بابت غٹ صوبہ و بنجائی اکائی و اسٹیک ہولڈر آتون المی سلابت کننگ نا ہم پارت کرے۔ وزیراعظم پارے کہ لیپ ٹاپ اسکیم نا وڑآ سرکاری اسکول آتا گچین کارکڑد نشان تروک آ طالب علم آتیٹی ای۔ موٹربائیک بشخنگک۔ وزیراعظم آخبت غٹ بنجائی سرکاری ادارہ غاتیٹی بیرہ الیکٹرک موٹربائیک ہلنگک تانکہ قومی خزانہ نا بچت مرے۔ وزیراعظم دابابت غٹ بنجائی وزارت آتے پارت جاری کننگ نا پرمان کرے۔ وزیراعظم کیپیٹل ڈویلپمنٹ اتھارٹی ءِ اسلام آباد اٹی بجلی آ چلینگوک آ پبلک ٹرانسپورٹ نا بابت جوان ءُ پلان اس شین تننگ نا ہم پارت کرے۔ دیوان ءِ ملک اٹی ای۔وہیکلز ناکاریم اٹ اتنگ نا مون آ دننگ نا بابت حوال اٹی پاننگاکہ 2022آن داتم اسکان ہندی کہول آ 2و 3 پہیہ غاتیا چلینگوک آ الیکٹرک گاڈی تا تیاری کن 49 لیسن جاری کننگانے ہرافتیان 25 کارخانہ غاتیٹی دا گاڈی تے جوڑ کننگ بناکرینے۔ دِیوان ءِ مستی پاننگاکہ 4 پہیہ غاتیا چلینگوک آ الیکٹرک گاڈی تا ہندی کہول آ تیاری نا بابت اولیکو لیسن ستمبر 2024 اٹی جاری کننگانے، ہندی کہول آ تیارکروک آ اولیکو الیکٹرک کار داسال دسمبراسکان مارکیٹ اٹی بریک۔ دیوان ءِ معلومدار کننگاکہ ملک اٹی داوخت آ 2 و 3 پہیہ غاتیا چلینگوک آ الیکٹرک وہیکلز آتا کچ 45 ہزار ءِ وخت اس کہ پہیہ غاتیا چلینگوک آ الیکٹرک وہیکلز آتا کچ 2600 ءِ۔ دیوان ءِ مستی پاننگاکہ الیکٹرک گاڈی تیکن ری۔ چارج سٹیشن اولیتی بنداوتیا موٹروے، جی ٹی روڈ(قومی شاہراہ 5) ، قومی شاہراہ 65 و70 آ خلنگک۔ دیوان اٹی بنجائی وزیر اقتصادی امور احد خان چیمہ بنجائی وزیر صنعت و پیدوار رانا تنویرحسین، بنجائی وزیر پاور اویس احمد خان لغاری، بنجائی وزیر سائنس و ٹیکنالوجی ڈاکٹر خالد مقبول صدیقی، وزیر مملکت خزانہ و محصولات علی پرویزملک، وزیراعظم نا کوآرڈی نیٹر موسمیاتی بدلی رومینہ خورشید عالم ، وزیراعظم نا کوآرڈی نیٹر رانا احسان افضل و تعلقدار بڑزکو سرکاری آفیسر آک بشخ ہلکر۔