اسلام آباد۔12ستمبر (اے پی پی): مزن وزیر محمد شہباز شریف ءَگشتگ کہ میجر راجہ عزیز بھٹی شہید جرأت و بہادری ءِ نشان جوڑ بوتگ ءُ دژمنءُ لاہورءِ نیامءَ یک آئن ءِ ڈھیوالے جوڑ بوتگ، میجر راجہ عزیز بھٹی شہید نشان ِ حیدر ءَ ستمبر 1965 ءِ جنگءَ وتی بہادری ءُ مز ن دلیءَ چہ دژمن ءِ ناپاکیں مولءُ مراداناں پروش داتگ۔ پنچ شمبے ءِ روچءَ مزن وزیر کارگسءِ میڈیا ونگ ءَ چہ شنگ بوتگیں بیان ءِ ردءَ مزن وزیر محمد شہباز شریف ءَ میجر راجہ عزیز بھٹی نشان حیدرءِ 59 می شہید ءِ روچءَ آئیءَ را دادءُ سلام پیش کتگءُ گشتگ کہ میجر راجہ عزیز بھٹی شہید نشانِ حیدر ءَ ستمبر 1965 ءِ جنگءَ وتی وتی بہادری ءُ جرأتءَ چہ دژمن ءَ را پروش داتگ، لاہورءِ سرءَ اُرش کنگءُ قبضہ کنگءِ دژمنانی وابءَ را پروش داتگ ءُ آیاناں تاچینگءَ مجبور کتگ۔ آئیءَ گشتگ کہ میجر راجہ عزیز بھٹی شہید نشانِ حیدرءَ پہ ماتیں وطن ءِ ھاترءَ بے مٹیں قربانی داتگ کہ آئیءِ قربانی دائم ءَ یات کنگ بیت۔ مزن وزیر ءَ گشتگ کہ میجر راجہ عزیز بھٹی شہید نشانِ حیدر ءَ وطن ءِ ھاترءَ جان ءِ پرواہ نہ کتگ ءُ دژمناناں پروش داتگءُ شہید بوتگءُ پہ آیوکیں پدریچءَ درورے جوڑ بوتگ ، منءَہوار سرجمیں راج میجر راجہ عزیز بھٹی شہید نشانِ حیدر ءُملک ءِ دیمپانی ءِ ھاترءَ جان ندر کنوکیں ہرچ ورناہ ءَ را دادءُ سلام پیش کنت۔ آئیءَ گشتگ کہ پاکستانی راج وتی شہید ءُ آیانی ھاندانانی قربانی ءَ کدی ہم شموشت نہ کنت۔
