اسلام آباد۔11ستمبر (اے پی پی): مزن وزیر محمد شہباز شریف ءَ گوشتگ کہ پاکستان ءِ درستاں چہ مستریں مڈی ءَ را ازمکار یں ورنا انت۔ پاکستان ءَ لیب ءُ گوازی ءِ میداسن ءَ را آبات کنگ حکومت ءِ ترجی انت۔ مکس مارشل آرٹس شوبگ ءَ حکومت ءِ پاکستان فیڈریشن ءَ را سرجمیں کک کنت۔ اے ھیالانی درشانی آئی ءَ پاکستان مکس مارشل آرٹس فیڈریشن ءِ کارندہ ءُ لیب ءُ گوازی ءَ گوں تران کنان ءَ کت آئیءَ چار شمبے ءِ روچ ءَ ادا آئی ءَ گوں گند ءُ نند کت۔ گند ءُ نند کنگ ءَ صدر پاکسان مکس مارشل آرٹس فیڈریشن عمر احمد ، چمپیئنز ایمان خان، بانو بٹ، بریو کامبیٹ فیڈریشن ونرز رضوان علی، ضیاء مشوانی ءُ اسماریل خان ھوار بوتگ انت۔ اے موہ ءَ بنجاھی وزیر اھوالکاری ءُ شنگ کاری عطا اللہ تارڑ ، وزیر ءِ مملکت برائے انفارمیشن ٹیکنالوجی شہزہ فاطمہ خواجہ ، چیئرمین مزن وزیر یوتھ پروگرام رانا مشہود احمد خان، مزن وزیر ءِ کورآرڈینیٹر رزرومینہ خورشید عالم ، بدر شہباز ءُ سیادی داروکیں کارندہ آں بھر زوری کت۔ مزن وزیر ءَ گوشت کہ پاکستان ءِ درستاں چہ مستریں میراس پاکستان ءِ بلدکاریں ورنا انت۔ انٹرنیشنل مکس مارشل آرٹس فیدریشن ایشیئن چیمپئن شپ ءَ پاکستان ءَ لیبی آں 12 میڈل باج برتگ ءُ ملک ءُ راج ءِ سر ءَ را پھر ءَ چہ برز کتگ۔ منی گیشاں چہ گیش واھگ انت کہ پاکستان ءِ لیبی انچو میاں اوستمانی تک ءَ مقابلہ ءَ ملک ءُ راج ءِ نام ءَ را روژنا کنت انت۔ شمے درستیں لیبی آں گوں گند ءُ نند کنگ ءَ چہ دلی وشی بوتگ۔ شما پاکستان ءِ گران بھائیں برورد ات۔ شمے درستانی ازم ءَ را گندگ ءَ چہ دل یکیم بوتگ آن پاکستان ءِ آیوکیں باندات روژنا انت۔ اے موہ ء مزن وزیر ءَ را فیڈریشن ءُ مزن وزیر یوتھ پروگرام ءِ کمک ءَ چہ برجم بوھوکیں مکس مارشل آرٹس ءِ میاں اوستمانی مقابلہ ءِ بابت ءَ سرپد کت ایشانی تہ ءَ 18 ملک آں چہ 300 اتھلیٹس آں بھر زوری کتگ۔ پاکستانی اتھلیٹس آں 4 سلور میڈلز ھم در جتگ وھدیکہ پاکستان ءِ دو زالبول آناں فائٹرز ءِ گولڈ میڈلز باج برتگ۔ گولڈ میڈلز باج بروک آنی تہ ءَ ایمان خان ءُ بانو بٹ ءَ ابید ایندگر لیبی آں مزن وزیر ءَ را وتی کار کرز ءِ بابت ءَ سرپد کت۔ مزن وزیر ءَ را مکس مارشل آرٹس ءِ شوبگ ءَ دیمروئی دیگ ءِ شور ءُ مشور پیش کنگ بوت۔ مز ن وزیر ءَ سیادی داروکیں کارندہ آناں شور ءُ مشور پیش کنگ ءِ پنت ءُ شون کت۔
