کراچی۔ 11 ستمبر(اے پی پی) سندھ انا پنی آ سرجن ڈاکٹر مرلی دھر پارینے کہ پاکستان تون اوار دنیا ٹی بیرہ اِرا ملک ہندن ءُ ہرافتے ٹی پولیو داسہ ہم ارے، افریقہ کون آ ملک آتیان پولیو ءِ چٹفنگانے ، گلوبل پولیو ایریڈیکیشن انیشی ایٹیو نا رداٹ دا تم اسکان دونیم ارب چناتے پولیو آن بچفنگ نا پڑی کنفنگانے۔ وائلڈ پولیو نا اسہ کیس اسے نا ساڑی گری ٹی ہم ناجوڑ آتا کچ اٹی ودکی نا خطرہ برقرار سلک، ننے دامرض انا چٹفنگ کن سنجیدہ مروئی مریک۔ اے پی پی تون ہیت کرسا ڈاکٹر مرلی دھر پارینے کہ 1994 ء آن پاکستان اٹی پولیو نا چٹفنگ نا پروگرام 339،521تربیت یافتہ کارندہ غاتا چاروکی ٹی برجاءِ ہراکہ دنیا نا غٹ آن بھلا پولیو نا چٹفنگ نا پروگرام ءِ ، ہراٹی پاکستان و دنیا نا پنی آ چاہندار دینی مرض آک اوار ءُ۔ پاکستان اٹی 1990ء ٹی پولیو نا 20 ہزار ناجوڑ خننگار۔ داسال پاکستان اٹی پولیو نا 14 ناجوڑ خننگانے ہرافتے ٹی بلوچستان آن 11 ، سندھ آن 2 وپنجاب نا اسہ ناجوڑ اس اوار ءِ۔ سندھ انا اِرا ناجوڑآتیان اسٹ نا تعلق شکارپور و ایلونا کراچی کیماڑی آن ءِ، اوپارے کہ بلوچستان نا 11 ناجوڑ آتیان 5 انا تعلق قلعہ عبداللہ غان ءِ۔ نیشنل انسٹی ٹیوٹ آف ہیلتھ فارپولیو ایریڈیکیشن تون وابستہ لیبارٹری نا رداٹ یونین کونسل صدر مسلم باغ قلعہ غان تعلق تخوک آ 20 تُو انا چنا دامرض آن زوال کرے، اوپارے کہ 2020ء ٹی پولیو نا 26 کیس بلوچستان، 22 سندھ ، 22خیبرپختونخواہ غان وخت اس کہ 14 کیس پنجاب آن رپورٹ مس۔ 2022ء ٹی پولیو نا 20 کیس مون آ بس ہرافتا تعلق خیبرپختونخوا آن ئس، 2023 اٹی کل 6 ناجوڑ مون آ بسر ہرافتیان 4 انا تعلق خیبرپختونخوا و2 نا سندھ آن ئس۔ ڈاکٹر مرلی دھر پارے کہ وائلڈ پولیو نا اسہ کیس اسے نا ساڑی گری ٹی ہم ناجوڑ آتا کچ اٹی ودکی نا خطرہ برقرار سلک۔ اوپارے کہ دا مرض انا ساڑی گری پک کیک کہ چناتے ویکسین اٹی ڈیوالئی مسنے۔ و ہندا رداٹ پولیو نا چٹفنگ نا بارواٹی وزیراعظم نا فوکل پرسن عائشہ رضا فاروق ہم بلوچستان اٹی پولیو نا مون آ بروک آ کیس آتیا گڑتی نا درشانی ءِ کرینے، اوپارے کہ گلوبل پولیو ایریڈیکیشن انیشی ایٹیو (جی پی ای آئی) 1988 ء ٹی جوڑ کننگاسس۔ داپروگرام نا بناآن داتم اسکان دونیم ارب چناتے پولیو آن بچفنگ نا پڑی کنفنگانے، ہراٹی 200 ملک و 20 ملین منشاکار آک بشخ ہلکنو۔ ڈاکٹر مرلی پارے کہ جنگلی دین ننتون اوار بیرہ اِرا ملک آتیٹی ارے و داننکن لمحہ فکریہ اسے کہ 2000ء ٹی دیکی بحرالکاہل نا ڈیہہ، 2002 ء ٹی یورپی ڈیہہ، 2014 ء ٹی سویل دے ٹکی ایشیانا ڈیہہ، یعنی انڈونیشیا غان ہلیس ہندوستان اسکان، 11 ملک آتے پولیو آن پاک گوندنگا۔ اوپارے کہ 2020ء ٹی افریقہ پولیو آن پاک مروک آ پنچ میکو ڈیہہ جوڑ مس، اومستی پارے کہ 20 ملین آن زیات چنا ہرافتے ویکسین کنفنگاسس معذوری آن بچار و او تینا نت تینا ہنار۔ اوپارے کہ ننے پاکستان آن پولیو نا چٹفنگ کن سنجیدہ مروئی مریک۔
