اسلام آباد۔ 04 ستمبر (اے پی پی) بنجائی وزیرداخلہ محسن نقوی تون چیئرمین مرکزی رویت ہلال کمیٹی پاکستان مولانا سید محمد عبدالخبیر آزاد اوڑدہی کرے ہراٹی امن و دہشت گردی وفرقہ واریت نا چٹفنگ، مذہبی ہم آہنگی ، رواداری و بین المسالک سیوت ءِ مون آ دننگ کن گام گیج آتیا گپ وتران کننگا۔ وزیرداخلہ محسن نقوی نا پاننگ ئس کہ دہشت گردآتا ہچءُ دین ومذہب اس اف، دہشت گردی نا برخلاف جنگ اٹی عالم دینک مہالو ہم قوم انا راہشونی ءِ کریر وداسہ ہم اوناسخت گرج ءِ۔ دہشت گردی نابرخلاف جنگ اٹی گچین بیانیہ کن غٹ مسلک آتا عالم دین آتون سلابت کننگک۔ اوپارےکہ عالم دین تتون سلابت نا قومی مہم نا زوت بناءِ کننگک۔ دہشت گردی نا برخلاف جنگ پاکستان نا بقانا جنگ ءِ۔ داناسور نا چٹفنگ کن عالم دین تے اسہ وار ولدا تینا عظیم کڑد ءِ ادا کروئی ءِ۔ عالم دینک مدام پاکستان نا شونداری وشونہالی ٹی تینا پبی کڑد ءِ ادا کرینو۔ اوپارےکہ دشمن بدامنی تالان کرسا بے چیٹی ودی کرسا قومی یکجہتی ءِ نسخان تننگ خواہک۔ غٹ اواری مرسا دشمن ناناپاک ایجنڈا ءِ بے سہب کینہ۔ مولانا سید عبدالخبیر آزاد پارے کہ پیغام پاکستان، پاکستان نا ہمو عظیم بیانیہ ءِ ہرا دہشت گردی ، انتہاپسندی و فرقہ واریت ءِ حرام گوندانے۔ ساڑی آ حالیت آتیٹی بین المسالک و بین المذاہب ہم آہنگی و قومی یکجہتی کن غٹ ءِ کڑد ادا کروئی مریک۔ پاکستان اٹ امن کن وزیرداخلہ محسن نقوی نا کوشست و خذمت ستاکڑزک۔ اوپارےکہ دہشت گردی ، انتہاپسندی نا چٹفنگ کن مچ آ قوم تینا بہادر سلہہ بند فوج و سیکورٹی ادارہ غاتون سلوک ءِ۔ وزیرداخلہ محسن نقوی مولانا عبدالخبیر آزاد نا مذہبی ہم آہنگی، سیوت و وحدت نا بابت خذمت آتا ستاءِ کرے۔
