اسلام آباد۔4ستمبر (اے پی پی): بنجاھی وزیر اھوالکاری، راجی مڈی ءُ دود ءُ ربیدگ عطا اللہ تارڑ ءَ گوشتگ کہ گران بھائی ءِ کساس سنگل ڈیجٹ ءَ سر ءَ اتکگ، ملکی برآمدات آنی تہ ءَ گوستگیں سال ءِ مقابلہ ءَ 14 درسد گیشی بوتگ، لس مردی کٹ ءُ گران بھائی ءِ تہ ءَ کمی بوھگ ءَ انت۔ چار شمبے ءَ راجی اسمبلی ءِ دیوان ءَ راجی اسمبلی ِباسک اسد نیازی ، جنید اکبر ، شیر افضل ءُ ایندگر آنی جست آنی پسو ءَ دیان ءَ بنجاھی وزیر اھوالکاری ءَ گوشت کہ علی امین خان ءِ گوما منوگری بوتگ کہ ھمودا شمے گپ ءُ لیکہ بنت ایشاناں ننداں ءُ گیوار کناں، خیبر پختونخواد صوبگ ءِ باز شرپ است انت، گیشتریں وانندگیں مردم خیبر پختونخوا صوبگ ءَ چہ پیداک انت۔ فیڈرز آناں بند کنگ ءَ چہ پیسر گہتر ھمیش انت کہ مئے گوما گپ ءُ تران بکت انت۔ آئیءَ گوشت کہ لائن لاسز ءُ توان دزئی ءِ گر ءُ دار ءِ و استہ گامگیج بکن گڈا لوڈشیڈنگ زیرو بیت۔ بلوچستان ءَ چہ اختر مینگل ءِ ھوالگ ءَ آئی ءَ گوشت کہ اختر مینگل ءِ جیڈھ ءُ لیکہ آناں گپ ءُ تران ءِ گوما گیوار کنگ ءِ کوشست ءَ آں۔ اختر مینگل ءِ گوستگیں روچ ءَ اسمبلی ءِ باسک بوھگ ءَ چہ استعفیٰ دیگ ءِ جیڈھ ءِ ھوالگ ءَ ھاسیں پارلیمانی کمیٹی ءِ جوڑی کنگ بوتگ۔ اے کمیٹی مرچی چار شمبے ءَ اختر جان مینگل ءَ گوں گند ءُ نند کت۔ ءُ جیڈھ آناں گپ ءُ تران ءِ سر ءَ گیواری ءِ جہد ءَ کنت۔ آئی ءَ گوشت کہ اختر مینگل ءُ آئی ءِ پت ءِ بلوچستان ءُ پاکستان ءِ واستہ بازیں ازمت است انت ایشاناں ما درست مناں۔ بنجاھی وزیر ءَ گوشت کہ گران بھائی کساس سنگل ڈیجٹ ءِ سر ءَ اتکگ ملکی برآمدات ءَ گوستگیں سالءِ مقابلہ ءَ 14 درسد گیشی بوتگ۔ افراط زر ءُ گران بھائی ءِ تہ ءَ کمی بوھگ ءَ انت، تجارتی وام آنی تہ ءَ باز کمی بوھگ ءَ انت، ایف بیآر ءِ پڑ ءَ گہتری آرگ ءَ آں تانکہ ٹیکس ءِ گرگ ءِ پڑ ءَ گیشی بہ بیت۔ آئی ءَ گوشت کہ استیں حکومت ملکی معیشت ءَ ر ا سکی آں چہ سر کنگ ءَ انت، ملکی معیشت ءَ را ڈیفالٹ ءِ سیم سر آں چہ واتر ٹریک ئَ آورتگ، آئی ءَ گوشت کہ مئے تجارتی ھساب ءُ داد پازیٹو بوھگ ءَ انت ، ایف بی آر ءِ سیم سر ھم در جنگ بنت۔
