کوئٹہ۔ 04 ستمبر (اے پی پی) وزیراعلیٰ بلوچستان میر سرفراز احمد بگٹی پارینے کہ دہشت گرد آک آسان ہدف آتے شست کیرہ ، نن کودک مخلوق ءِ شست کروک آتے نشان عبرت کینہ، بلوچستان اٹی اسہ دہشت گرد اسے تون ہم رعایت مفک، حکومت بلوچستان طالب علم آتے اسکالر شپ آ ہارورڈ و آکسفورڈ آ گدریفنگ ءِ وخت اس کہ بشیر زیب اوفتے خودکش بمبار جوڑ کننگ ءِ، بلوچستان نا الس ءِ فیصلہ کروئی مریک کہ اوفتا حق اٹی دیر ءِ، بلوچ مدام جنگ و جدل اٹی مس ولے او جنگ آک مدام قدر وروایت آتا رداٹ کننگارہ، دادہشت گرد آک گپ وتران نا پن آ کودک مخلوق ءِ کسفنگ ءُ، نن وار وار پان کہ اسہ بلوچ اس ہم پشتون اس یا پنجابی اس خلتنے بلکن دہشت گرد آک پاکستانی تے شہید کرینو۔ داخیال آتا درشانی ءِ او صوبائی کابینہ نا دیوان آن تران کرسا کرے ۔ دیوان اٹی ساڑی آ دہشت گردی نا واقعہ غاتیٹی شہید مروک آورنا و شاری تیکن دعاپاتیاکننگا۔ وزیراعلیٰ بلوچستان میر سرفراز بگٹی پارے کہ بلوچستان اٹی دہشت گردی نا ساڑی آ واقعہ غاتیٹی ہراوڑ ودکی مون آ بس و اوڑآ بلوچستان اسمبلی نا باسک آک یکسو و یک زبان مرسا دہشت گردی نا مذمت ءِ کریر، اینو صوبائی کابینہ ہم بلوچستان نا مخلوق نا توار ءِ ہرسا نئے بیرہ داواقعہ غاتا مذمت ءِ کیک بلکن مذمت تون کابینہ نا کلہو ءِ کہ دہشت گرد آک آسان ہدف پٹرہ و ولدا کودک شاری تے شہید کیرہ ۔ اوپارے کہ دا پن انا جنگ انا نان کائنٹک ریسپانس نن سنگت آتیا عائد مریک ولے المی ءِ کہ گورننس ناماڈل ءِ گچین کین، ننے اسہ سمت انا تعین ءِ کروئی ءِ و داسمت اٹی لس بلوچی ءِ ننا گام گیج آتیان فائدہ ملے۔ مہالو ہم صوبائی وزیر و سیکرٹری تے پارت کریسن کہ گورننس نا گچینی کن اواری اٹ کاریم کننگ نا گرج ءِ، ہروزیر یا سیکرٹری ہرضلع نا دورہ ءِ کرسا کے و حالیت آتا جاچ ءِ ہلے۔
