اسلام آباد۔ 04 ستمبر (اے پی پی) وزیراعظم محمد شہباز شریف پارینے کہ مشکل حالیت آتیٹی جون ءِ خطرہ ٹی شاغسا انسانی جون تے بچفنگ بہادری اسے، تینا جون نا پرواہ ءِ کننگ آن بیدس نوکاپی دیر اٹی اختہ مخلوق ءِ بچفوک آ ایکسکویٹر ڈیور محب اللہ غا مچ آ قوم گمر کیک۔ چارشنبے نادے آ وزیراعظم آفس نا میڈیا ونگ آن جاری بیان نار داٹ وزیراعظم محمد شہباز شریف داخیال آتا درشانی ءِ بلوچستان نا علاقہ قلعہ عبداللہ ٹی نوکاپی دِیر اٹی اختہ مخلوق ءِ بچفوک آ ایکسکویٹر ڈیور محب اللہ تون گپ وتران کرسا کرے۔ اومحب اللہ ءِ 25 لکھ روپئی انعام تس و اونا چناتیکن مفت تعلیم و ایلو آسراتی تا ہم پڑو ءِ کرے۔ اووزیراعظم ہاؤس آ بننگ آ محب اللہ ءِ بخیر اٹ پارے۔ وزیراعظم محب اللہ نا انسانی جون تے بچفنگ نا جوزہ نا ستاءِ کرے۔ اوڑدہی ٹی بنجائی وزیر حوالکاری وشینکاری عطاء اللہ تارڑ، وزیر واپار جام کمال خان، وزیر مملکت انفارمیشن ٹیکنالوجی شزہ فاطمہ خواجہ، چیئرمین وزیراعظم یوتھ پروگرام رانا مشہود احمد خان ، وزیراعظم نا کوآرڈی نیٹر چاگڑدی بدلی ومینہ خورشید عالم و تعلقدار بڑزکو کمامدارآک ساڑی ئسر۔ وزیراعظم پارےکہ کنتون اوار مچ آ قوم نے آ گمر کیک۔ نا انسانیت تون مہرومریبت نا جوزہ نا است اٹ قدر ءِ کیوہ۔ وزیراعظم پارےکہ نی قوم انا ہیرواُس، نی ہمت آن کاریم ہلسا نہادی انسانی جون تے بچفیس۔ داوڑنا مشکل حالیت آتیٹی تینا جون ءِ خطرہ ٹی شاغسا انسانی جون تے بچفنگ بہادری نا کاریم اسے۔ وزیراعظم محب اللہ نا بہادری نا اعتراف اٹی اودے حکومت نا کنڈآن 25 لکھ روپئی انعام ہم تس۔ وزیراعظم محب اللہ نا چناتیکن یونیورسٹی اسکان نا تعلیم ءِ مفت و اونا خاہوت ءِ جان جوڑی نا مفت آسراتی تا فراوانی نا ہم پڑوکرے۔ داوخت آمحب اللہ وزیراعظم تون گپ وتران کرسا پارے کہ نیتون اوڑدہی کنکن شرفمندی نا ہیت اسے۔ مخلوق نا جون تے بچفنگ نا وخت آ اسُل سجفتویسس کہ دا ہیت مچ آملک اٹی مشہور مریک۔ اوپارےکہ وزیراعظم و حکومت نا منت واراُٹ کہ او دا گام انا ستاءِ کریر و کنکن قیمتی ءُ وخت اس کشار۔ وزیراعظم ہاؤس اٹی وزیراعظم نا کنڈآن عزت افزائی آ است انا احب اٹ اونامنت واراُٹ۔
