وزیراعظم شہبازشریف نا نوکاپ آن مروک آ بھسکاری آ بنگلہ دیش نا حکومت و الس تون ہمدردی نا درشان

اسلام آباد۔ 30 اگست (اے پی پی) وزیراعظم محمد شہباز شریف بنگلہ دیش اٹی نوکاپ آن مروک آ بھسکاری آ بنگلہ دیش نا حکومت و الس تون ہمدردی نا درشانی ءِ کرینے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف و السی جمہوریہ بنگلہ دیش نا حکومت نا چیف ایڈوائزر پروفیسر محمد یونس ٹیلی فون آ گپ وتران کریر۔ وزیراعظم محمد شہباز شریف پروفیسر محمد یونس  ءِ چیف ایڈوائزر نا عہدہ ءِ سنبھالنگ آ مبارکبادی تس و بنگلہ دیش نا راجی و اقتصادی شونداری ٹی اوناکڑد انا ستاءِ کرے۔ اوبنگلہ دیش اٹی ساڑی آ نوکاپ آن مروک آ بھسکاری آ بنگلہ دیش نا حکومت و الس تون ہمدردی نا درشانی ءِ کرے۔ وزیراعظم چندی بشخ آتیٹی کمکاری ءِ ودفنگ نا کمک اٹ ہڑتوم آ کنڈآتا تعلقداری تے پین گچین کننگ نا اہمیت آ زور شاغا۔ پاکستان و بنگلہ دیش نا نیام اٹ تاریخی، مذہبی  و دودوربیدہ ئی رشتہ غاتا ذکرءِ کرسا وزیراعظم ہڑتوم آ ملک آتا نیام اٹ واپاری تعلقداری، دودوربیدہ ئی ہل و تس و الس نا نیام اٹ رابطہ غاتے مون آ دننگ نا است خواہی نا درشانی ءِ کرے۔ ہڑتوم آ راہشونک امنا کریر کہ پاکستان و بنگلہ دیش نا الس نا شونداری وشونہالی کن اواری اٹ کاریم کننگ نا گرج ءِ۔ اومستی امناکریر کہ گیشتر علاقائی کمکاری سویلی ایشیانا مخلوق نا زند ءِ گچین کننگ اٹ اہم  ءُ کڑد اس ادا کننگ کیرہ۔ پروفیسر محمد یونس ٹیلی فون کال آ وزیراعظم نا منت واری ءِ ہرفے۔